26.11.2024 | 16:11
Անկարան ԱՄՆ-ից արտոնություն է ուզում․ պատժամիջոցների պատճառով Թուրքիան չի կարողանա ՌԴ-ին վճարել բնական գազի համար
Ղազախստանում թուրքական ANKA հարվածային ԱԹՍ-ներ են արտադրվելու․ համատեղ ձեռնարկություն է հիմնվում
Քաղաքականություն
11.05.2022 | 14:18
Թուրքական արտադրության ANKA հարվածային անօդաչու թռչող սարքերն արտադրվելու են Ղազախստանում։ Այս մասին հայտարարել է անօդաչուները մշակող թուրքական օդատիեզերական Türk Havacılık ve Uzay Sanayi AŞ (TUSAŞ) ընկերությունը, գրում է «Անադոլու» գործակալությունը։
Ընկերությունից հիշեցրել են, որ անցյալ տարի ղազախական կողմի հետ պայմանագիր է ստորագրվել ANKA անօդաչուների մատակարարման համար։ Օրերս էլ Անկարա ղազախական պատվիրակության այցի շրջանակում TUSAŞ-ի և Kazakhstan Engineering-ի միջև նոր համաձայնագիր է ստորագրվել՝ արդեն Ղազախստանում անօդաչուների համատեղ արտադրության մասին։
Անօդաչուների տեխնիկական սպասարկումն ու վերանորոգումը ևս Ղազախստանում համատեղ ձեռնարկությունում է տեղի ունենալու։ Այսպիսով, Ղազախստանը դառնում է արտասահմանյան առաջին երկիրը, որտեղ ANKA անօդաչու սարքերի արտադրություն է հիմնվելու։
TUSAŞ-ի գլխավոր տնօրեն Թեմել Քոթիլը գոհունակություն է հայտնել ANKA անօդաչու սարքերի նկատմամբ օտարերկրյա գործընկերների աճող հետաքրքրության կապակցությամբ։
«Նոր համաձայնագիրը նպաստելու է եղբայրական Ղազախստանի հետ բարեկամական կապերի հետագա ամրապնդմանը»,- ասել է Քոթիլը։
Հավելենք, որ Ղազախստանի նախագահ Կասիմ-Ժոմարտ Տոկաևն առաջին պաշտոնական այցով գտնվում է Անկարայում։ Թուրքիայում է նաև Ղազախստանի պաշտպանության նախարարը, որը նախօրեին հանդիպել էր իր թուրք գործընկերոջը։
Էմմա Չոբանյան
