26.11.2024 | 17:38
Բրյուսելը պնդում է, թե Ադրբեջանը ռուսական գազը չի վերարտահանում ԵՄ․ POLITICO
ՆԱՏՕ-ին անդամակցելու՝ Ֆինլանդիայի հայտը ջերմորեն կընդունվի. Ստոլտենբերգ
Քաղաքականություն
05.05.2022 | 22:33
ՆԱՏՕ-ին անդամակցելու Ֆինլանդիայի սպասվող հայտը կքննարկվի Բրյուսելում՝ դաշինքի կենտրոնակայանում և ջերմորեն կընդունվի։ Այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը, գրում է swissinfo-ն։
«Անդամակցության որոշումը լիովին Ֆինլանդիայի ձեռքում է։ Դիմումից հետո Ֆինլանդիան ջերմ ընդունելության կարժանանա: 30 դաշնակիցների ուղերձն այն է, որ Ֆինլանդիային ջերմորեն ընդունում են, գրկաբաց: Մենք կապահովենք, որ գործընթացը լինի արագ և արդյունավետ»,- ասել է Ստոլտեբերգը ֆիննական Yle հեռուստաալիքի եթերում։
Նրա խոսքով՝ Ֆինլանդիային նաև կարելի է աջակցել, օրինակ, քաղաքական հռչակագրերով, հայտարարություններով կամ իր հարևան տարածաշրջանում ՆԱՏՕ-ի զորավարժություններով։
«Կան բազմաթիվ միջոցներ, որոնցով մենք կարող ենք արտահայտել, որ Ֆինլանդիայի անվտանգությունը կարևոր է ՆԱՏՕ-ի դաշնակիցների համար»,- ասել է Ստոլտենբերգը։
Նրա խոսքով՝ Ֆինլանդիայի անդամակցությունը կամրապնդի ՆԱՏՕ-ն։
«Այն ունի ժամանակակից և լավ հագեցված պաշտպանական ուժեր և ներդրումներ է կատարում նոր կործանիչների հարցում, ժողովրդավարական կառույցներում»,- ասել է նա:
Նշենք, որ ՆԱՏՕ-ին անդամակցության հարցը քննարկվում է Ֆինլանդիայի խորհրդարանում։ Ապրիլի առաջին կեսին կառավարությունը խորհրդարանականներին է ներկայացրել անվտանգության զեկույց, որը թվարկում է ՆԱՏՕ-ին երկրի անդամակցության հնարավոր հետևանքները, ներկայացնում հետագա զարգացումների տարբերակներ և նկարագրում երկրում անվտանգության իրավիճակի փոփոխությունները։
ՆԱՏՕ-ին անդամակցելու ուղղակի որոշումը նախագահը կայացնելու է ներքին և արտաքին անվտանգության հարցերի նախարարական հանձնաժողովի հետ միասին։ Սպասվում է, որ պետության ղեկավարն իր տեսակետը կներկայացնի մինչև մայիսի 12-ը։
Էմմա Չոբանյան
