Իշխանությունը հատել է բոլոր կարմիր գծերը՝ հրաժարվում է Արցախի ինքնորոշման իրավունքի պահանջից․ Հովհաննես Ղազարյան․ ՏԵՍԱՆՅՈՒԹ

«5165 շարժում» կուսակցությունը, որի շարքերում է նաև Հովհաննես Ղազարյանը, այս օրերին ակցիաներով վարչապետ Նիկոլ Փաշինյանի հրաժարականը պահանջող քաղաքական ուժերից է։ Factor TV-ի հարցազրույցում նա հիմնավորեց՝ ինչո՞ւ են իշխանությանը ներկայացրել այսպիսի պահանջ․ «Իշխանությունը՝ Նիկոլ Փաշինյանը, հատել է բոլոր այն «կարմիր գծերը», որոնք մեր 30-ամյա պետականության վերականգնման պատմության ընթացքում գծել ենք, պաշտպանում ենք և դրանից այն կողմ անցնել պատրաստ չենք, որովհետև պաշտպանում ենք մեր պետական և ազգային շահը»։

Ընդդիմադիր գործիչն անգամ համոզված է, որ Նիկոլ Փաշինյանը չի պատկերացնում՝ որոնք են ՀՀ-ի պետական և ազգային շահերը, և ունակ չէ դրանք պաշտպանել։

«Ի՞նչը հանդիսացավ փողոց դուրս գալու և ուժգին պայքար սկսելու առիթը․ դա իր ելույթն էր Ազգային ժողովում, որտեղ խոսում էր նշաձողն իջեցնելու մասին և ասում, որ պլաններում կա՝ հասնել արագ խաղաղության պայմանագիր կնքելուն։ Այս իրավիճակում Արցախի կարգավիճակի նշաձողն իջեցնելը, երբ հայկական կողմն է հայտնում դրա մասին, այն էլ՝ նման ձևակերպմամբ, նշանակում է, որ մենք հրաժարվում ենք Արցախի ինքնորոշման իրավունքի պահանջից և պատրաստակամ ենք Ադրբեջանի տարածքային ամբողջականության մեջ դիտարկել Արցախը»,- ասում է «5165 շարժում» կուսակցության հիմնադիր-անդամ Հովհաննես Ղազարյանը՝ ընդգծելով այդպիսի զարգացման անթույլատրելիությունը։

Հարցազրույցն ամբողջությամբ՝ տեսանյութում։

Ռոբերտ Անանյան