ՍԴ-Ն սահմանադրական ճանաչեց Ալեն Սիմոնյանի՝ ԱԺ նախագահի պաշտոնում ընտրությունը

Սահմանադրական դատարանը սահմանադրական է ճանաչել Ազգային ժողովի նախագահի ընտրության հարցը, որի իրավաչափությունն ընդդիմադիր խմբակցությունները վիճարկում էին Բարձր դատարանում։

Ինչպես Factor.am-ի հետ զրույցում նշեց ՍԴ մամուլի քարտուղար Եվա Թովմասյանը՝ որոշումը վերջնական է և ուժի մեջ է մտնում հրապարակման պահից։ ՍԴ ամբողջական որոշումը կհրապարակվի եռօրյա ժամկետում։

Հիշեցնենք՝ ի սկզբանե դատաքննությունը նախատեսված էր գրավոր ընթացակարգով, այսինքն` հարցի քննարկումն իրականցվելու էր դռնփակ: Սակայն տարեսկզբին Սահմանադրական դատարանը որոշում էր կայացրել անցնել բանավոր ընթացակարգի, ուստի հունվարի 25-ին նախատեսված առաջին նիստը հետաձգվել էր՝ կողմերի թերի պատրաստվածության հիմքով․ պատասխանող կողմը՝ Ազգային ժողովի ներկայացուցիչը ՍԴ դիմում էր ներկայացրել նիստը հետաձգելու մասին, նշելով, որ բանավոր ընթացակարգն իրենից առավել մեծածավալ աշխատանք է նախատեսում, ինչը կատարելու խնդիր ունեն։ Միջնորդությունը բավարարվել էր և հերթական նիստը նշանակվել ապրիլի 5-ին։

Թե որն է եղել պատճառը կամ ում առաջարկությամբ է ՍԴ-ն կրկին որոշել դռնփակ գրավոր ընթացակարգի անցնել, Բարձր դատարանը չի մեկնաբանում։

Հիշեցնենք՝ օգոստոսի 3-ին Ազգային ժողովում «Հայաստան» և «Պատիվ ունեմ» խմբակցությունները հայտարարել էին, որ Ալեն Սիմոնյանի՝ ԱԺ նախագահ ընտրվելը հակասահմանադրական է: Ընդդիմադիրները որպես պատճառաբանություն նշում էին այն, որ իրենց առաջադրած թեկնածուները կալանավայրում են, ինչն անհավասար պայմաններ է ստեղծել:

Ռոզա Վարդանյան