20.11.2024 | 08:36
Նիկոլ Փաշինյանը հայտնեց ՆԳ նոր նախարարի անունը
Աղբի կույտ ես տեսնում, հարցնում ես` որտեղի՞ց, ասում են` շաբաթօրյակ ենք արել, բերել ենք անտառ. Փաշինյան․ ՏԵՍԱՆՅՈՒԹ
Տեսանյութեր
28.04.2022 | 12:13
ՀՀ կառավարության այսօրվա՝ ապրիլի 28-ի նիստի ընթացքում խոսվեց նաև առաջիկայում անցկացվելիք շաբաթօրյակից։ Վարչապետը նկատեց․ «Աղբի կույտ ես տեսնում, հարցնում ես` որտեղի՞ց, ասում են` շաբաթօրյակ ենք արել բերել ենք անտառ»։
Ապրիլի 30-ին հայտարարված է համապետական շաբաթօրյակ: Համավարակով պայմանավորված՝ վերջին 2 տարիներին շաբաթօրյակ չի կազմակերպվել: Այս մասին Կառավարության նիստի ընթացքում տեղեկացրեց տարածքային կառավարման և ենթակառուցվածքների նախարար Գնել Սանոսյանը:
«Հիմա գործընկեր կառույցների հետ աշխատել ենք, բավականին ակտիվ ներգրավված են նախարարությունները, մարզպետարանները, Երևան համայնքը: Մի խնդիր կարող ենք ունենալ՝ կապված եղանակային պայմանների հետ, բայց շաբաթօրյակի օրը չենք փոխի: Այն մարզերում, որտեղ եղանակային պայմանները թույլ չեն տա, հաջորդ շաբաթ կիրականացնենք: Առիթից օգտվելով՝ մեր հայրենակիցներին, գործընկերներին ուզում եմ հորդորել՝ ներգրավվել առաջիկա շաբաթօրյակի աշխատանքներին»,- ասաց Սանոսյանը:
ՀՀ վարչապետ Նիկոլ Փաշինյանն այս թեմայի հետ կապված հանձնարարական տվեց՝ հաշվի առնելով տարածված մի խնդիր:
«Մենք շատ հաճած հետևյալ երևույթի հետ ենք բախվում, որ մենք գնում ենք, տեսախցիկների առաջ հավաքում ենք աղբը x վայրից և տեղափոխում y վայր: Հետո y վայրից տանում ենք z վայր: Սա չափազանցություն չէ, որովհետև մենք աղբավայրերի և կոշտ թափոնների կառավարման խնդիր ունենք:
Եթե մենք ունենալու ենք այդպիսի երևույթներ, ավելի լավ է՝ եկեք չանենք: Ավելի լավ է՝ կենտրոնանանք կոշտ թափոնների կառավարման մեր համակարգի ներդրման և աշխատանքի վրա, որովհետև աղբը պետք է տեղափոխվի միայն աղբավայր: Սա եկեք արձանագրենք որպես խստիվ հանձնարարական»,- ասաց Փաշինյանը:
«Մայրուղիների երկայնքով աղբի կույտ ես տեսնում, հարցնում ես` որտեղի՞ց, ասում են` շաբաթօրյակ ենք արել, բերել ենք անտառ»,- նշեց վարչապետը՝ հորդորելով՝ նման երևույթներ թույլ չտալ:
Մանրամասները՝ տեսանյութում:
