20.11.2024 | 11:10
Փոխքաղաքապետ Սուրեն Գրիգորյանի ասուլիսը՝ ՈՒՂԻՂ
Ալիևը ՌԴ փոխվարչապետ Օվերչուկի հետ հանդիպմանը «բողոքել» է Հայաստանից
Քաղաքականություն
26.04.2022 | 13:55
Ադրբեջանի նախագահ Իլհամ Ալիևն այսօր ընդունել է ՌԴ փոխվարչապետ Ալեքսեյ Օվերչուկին։ Հանդիպմանը քննարկվել են ռուս-ադրբեջանական հարաբերություններն ու Հարավային Կովկասում գործընթացները, հայտնում են ադրբեջանական լրատվամիջոցները։
Ալիևն անդրադարձել է Ադրբեջանի ու Ռուսաստանի միջև միջկառավարական հանձնաժողովի գործունեությանը և հույս հայտնել, որ հանձնաժողովի նիստում կատարված աշխատանքը կվերլուծվի, կքննակվեն համագործակցության ավանդական ոլորտներից զատ հնարավոր ուղղությունները, ինչպես նաև առևտրի ու ծառայությունների ծավալի ընդլայնման հարցերը։
Ադրբեջանի ղեկավարը նաև վստահություն է հայտնել, որ Ադրբեջան Օվերչուկի այցի ընթացքում կքննարկվեն նաև Հայաստանի, ՌԴ-ի ու Ադրբեջանի փոխվարչապետերի գլխավորությամբ եռակողմ աշխատանքային խմբի գործունեությունը, առաջին հերթին՝ Հարավային Կովկասում տրանսպորտային և հաղորդակցության ուղիների բացումը։
Բացի այդ, Ալիևը Հայաստանից իր բողոքներն ու դժգոհություններն է հայտնել Օվերչուկին։ Նա նշել է, որ Ադրբեջանն արդեն կառուցել է 100 կմ-ոց երկաթգծից 60 կմ-ը։
«Ադրբեջանական կողմը ճանապարհի կառուցման աշխատանքներն իրականացնում է ժամանակացույցին համապատասխան։ Ցավոք, Երևանը դեռ չի էլ սկսել որևէ աշխատանք դրա հետ կապված։ Հայաստանը նաև չի նշել իր տարածքով անցնող ավտոմոբիլային ճանապարհի հնարավոր երթուղու կոորդինատները։ Չնայած նրան, որ Ադրբեջանը բազմիցս բարձրացրել է այդ հարցը, Հայաստանի կողմից դրա հետ կապված պատասխան չի ստացվել»,- դժգոհել է Ալիևը։
Կողմերը քննարկել են նաև առևտրատնտեսական, տրանսպորտային, տարանցման, լոգիստիկ, ֆինանսական, բանկային, էներգետիկ ու նավթային ոլորտներում համագործակցության հարցեր։
Էմմա Չոբանյան
