Քաղաքականություն
19.04.2022 | 21:07Սուպերվարչապետական համակարգի թևերը կտրելու խոստումներով իշխանության եկած Նիկոլ Փաշինյանի օրոք ավելանում է վարչապետի ենթակայությամբ գործող պետական կառույցների թիվը: Առաջիկայում ուղղակիորեն Փաշինյանից հրամաններ կստանա նաև բարձրաստիճան պաշտոնյաների անվտանգությունն ապահովող Պետական պահպանության ծառայությունը:
ԱԱԾ-ն «Հատուկ պետական պաշտպանության ենթակա անձանց անվտանգության ապահովման մասին» օրենքում փոփոխություններ կատարելու նախագծով իր ենթակայությամբ գործող ՊՊԾ-ն սեփական նախաձեռնությամբ փոխանցում է վարչապետին:
Այսպիսով՝ սուպերվարչապետության ինստիտուտը Հայաստանում, «կատարելագործվում է», նշում է ԹԻՀԿ ծրագրերի ղեկավար Վարուժան Հոկտանյանը:
Իրավապաշտպան Ժաննա Ալեքսանյանն էլ արձանագրում է Նիկոլ Փաշինյանն իր անվտանգությունն ուժեղացնում է առաջիկայում Արցախի կարգավիճակի հետ կապված որոշումների կայացման ֆոնին:
Վարուժան Հոկտանյանը նշում է՝ բացի այն, որ Փաշինյանը իր և իր մերձավորների անվտանգությունն ապահովելու խնդիր ունի, փոփոխության պատճառ կարող է լինել նաև այն, որ վարչապետը չի վստահում ԱԱԾ-ին:
Ինչու է Փաշինյանն Արցախի կարգավիճակի հարցում զիջումների գնալու առաջարկի մասին հայտարարելուց և Ադրբեջանի հետ ենթադրյալ խաղաղության պայմանագիր ստորագելուց առաջ ուժեղացնում իր անվտանգությունը: Փաշինյանի թիմակից Անդրանիկ Քոչարյանը քաղհասարակության այս կարծիքներին ի պատասխան պնդում է՝ ՊՊԾ-ն անկախ ամենինչից Փաշինյանին է ենթարկվում:
Նշենք, որ այս նախագիծը դեռ շրջանառվում է «e-draft» համակարգում: Այն դեռ պետք է քննարկվի և ընդունվի ԱԺ-ի կողմից: Քաղհասարակության ներկայացուցիչները կասկած չունեն, որ ՔՊ-ականներն ԱԺ-ում կողմ կարտահայտվեն Փաշինյանի սուպերվարչապետական դիրքերն ամրապնդող և պաշտոնյաների ընտանիքների կյանքը բարեկեցիկ դարձնող նախագծին:
Մանրամասները՝ տեսանյութում։
Նարեկ Կիրակոսյան
