Քաղաքականություն
18.04.2022 | 19:02Factor TV–ի հարցազրույցը քաղաքագետ Ստեփան Գրիգորյանի հետ
–Ապրիլի 19-ին Նիկոլ Փաշինյանը մեկնում է Մոսկվա, կհանդիպի նաև Պուտինին, և գիտեք, որ Ղարաբաղյան հարցով շատ ակտիվ փուլ է, պարո՛ն Գրիգորյան, ուրբաթ Արարատ Միրզոյանն ու Լավրովն էին խոսել այս թեմայով, Մոսկվայի աջակցությամբ Հայաստանի և Ադրբեջանի համաձայնեցման հեռանկարն էին քննարկել: Մենք ի՞նչ կարող ենք սպասել Փաշինյանի այցից Մոսկվա, կլինե՞ն պայմանավորվածություններ:
-Այն փաստը, որ մեր ղեկավարը հանդիպում է Պուտինի հետ, երբ Պուտինը դառնում է պերսոնա նոն գրատա աշխարհի համար, դա խնդիր է: Այո՛, ստիպված ենք գնալ, ենթարկվել ինչ-որ չափով, բայց ցանկացած դեպքում լավ լուր չէ հիմա Պուտինի հետ հանդիպելը՝ հաշվի առնելով Ուկրաինայում պատերազմը, Ռուսաստանի ագրեսիվ պահվածքը, և ամենակարևորը այն, որ ամբողջ ժողովրդավարական աշխարհն այսօր Պուտինին չի ընդունում: Շատ լավ հարց տվեցիք՝ ի՞նչ սպասել Ռուսաստանից. անկեղծ ասած, ես Ռուսաստանից լավ բան չեմ սպասում: Հիշո՞ւմ եք Արարատ Միրզոյանի այցը Մոսկվա, որտեղ հանդիպեց Սերգեյ Լավրովի հետ:
-Բրյուսելյան եռակողմ հանդիպման հաջորդ օրն էր:
-Այո՛: Եթե հիշում եք, Լավրովն ասուլիսում մի քանի շատ կարևոր դիվանագիտական մեսիջներ տվեց: Ցավով եմ նշում, որ շատ քիչ մարդիկ, շատ քիչ փորձագետներ ու քաղաքական գործիչներ արձագանքեցին այդ լուրջ մեսիջներին: Մենք այդպես էլ փորձառություն ձեռք չբերեցինք՝ տողերի արանքում կարդալ և հասկանալ դիվանագիտական լեզուն: Ի՞նչ մեսիջներ ուղարկեց Լավրովը. «Մինսկի խումբ չկա, մեզ հետ չեն ուզում աշխատել, մենք կառուցողական ենք»:
-Եվ Արևմուտքին մեղադրեց հայկական շահերը զոհաբերելու մտադրության մեջ:
-Այո՛, և ինչի՞ համար էր դա: Ռուսաստանն է զոհաբերում մեր շահերը, բայց այդ ամենը գցում է Արևմուտքի վրա: Երկրորդ նպատակը՝ այդ նախադասությամբ ուզում է քանդել, ջարդել Մինսկի խումբը, ինչո՞ւ, որովհետև Մինսկի խումբը միակ պաշտոնական ձևաչափն է ՄԱԿ-ով հաստատված, և միակ ձևաչափն էր, որտեղ քննարկվում էր Լեռնային Ղարաբաղի կարգավիճակի հարցը: Երկրորդ մեսիջն այն էր, որ 3+3 ձևաչափը պետք է վերականգնել և ակտիվ աշխատեցնել, եթե Վրաստանը չլինի, 3+2 ձևաչափ կլինի, որտեղ մենք կմնանք երեք ընդգծված ավտորիտար ռեժիմների հետ՝ Ադրբեջանի, Թուրքիայի և Ռուսաստանի, և բոլորը հասկանում են, որ այդտեղ մեր շահերը չկան:
Եվ երրորդ մեսիջը՝ Փառուխ գյուղի հետ կապված․ Լավրովն ասաց, որ հանգամանքները պետք է ճշտենք, մինչդեռ հիշո՞ւմ եք ՌԴ պաշտպանության նախարարի հայտարարությունը՝ Ադրբեջանին խիստ քննադատող, դրանից հետո Ֆրանսիայի, ԱՄՆ-ի և Եվրախորհրդարանի հայտարարությունները, որոնցում, վաղուց այդպիսի բան չէր եղել, հասցեական քննադատություն կար Ադրբեջանի կողմից Փառուխ գյուղի բնակիչների դեմ ուղղված ագրեսիայի վերաբերյալ: Իսկ Լավրովն ասաց՝ չէ՛, մենք դեռ պետք է պարզենք՝ ինչ է կատարվել: Ես ցավում եմ, որ մեզ մոտ դա շատ քչերն են հասկանում, և նաև իշխանությունները պետք է հասկանան, որ այդ ուղերձներից հետո մեզ համար Մոսկվայից լավ բան չի սպասվում: Եվ «խաղաղության պայմանագիրը» մարդկանց ավտոմատ զինաթափում է: Այդ պայմանագրում ի՞նչ է ֆիքսվելու. մենք Նիկոլ Փաշինյանի խոսքից, վերջին մեսիջներից հասկացանք, որ այնտեղ Ղարաբաղի հարցով վտանգներ կան, մեծ աղմուկ է, և պետք է գումարել մեկ հարց, որը, ցավոք, մեզ մոտ ընդհարապես չի շոշափվում։
Ռոբերտ Անանյան
Հարցազրույցն ամբողջությամբ՝ տեսանյութում:
