20.11.2024 | 08:36
Նիկոլ Փաշինյանը հայտնեց ՆԳ նոր նախարարի անունը
Ղազախստանի, Վրաստանի, Ադրբեջանի և Թուրքիայի երկաթուղիները «Middle Corridor» համատեղ ձեռնարկություն են ստեղծում
Քաղաքականություն
11.04.2022 | 16:29
Վրաստանի, Ադրբեջանի, Թուրքիայի և Ղազախստանի երկաթուղիները մինչև 2023 թվականը ստեղծելու են «Middle Corridor» (TMTM) համատեղ ձեռնարկություն։ Այս մասին հայտնում է Rail-news.kz-ը՝ հղում անելով Railway Supply-ին։
Նշվում է, որ «Middle Corridor» (TMTM) համատեղ ձեռնարկությունը նախատեսվում է ստեղծել Ղազախստանի, Վրաստանի, Ադրբեջանի և Թուրքիայի երկաթուղիների միջև, որոնք «Անդրկասպյան միջազգային տրանսպորտային երթուղի» ասոցիացիայի մասնակիցներն են։
«Middle Corridor»-ի ստեղծման լուրը հաստատել է ասոցիացիայի գլխավոր քարտուղար Գայդար Աբդիքերիմովը RailFreight Summit-ի հատուկ թողարկման համար։
«Այո՛, համատեղ ձեռնարկությունը պաշտոնապես ձևավորվում է, սակայն արժե սպասել մինչև տարեվերջ։ Ընկերությունը պաշտոնապես կգրանցվի, ամենայն հավանակությամբ, 2023 թվականի կեսերին։ Համատեղ ձեռնարկության ստեղծման նպատակը «Middle Corridor»-ին արժեք հաղորդելն է, քանի որ այն կհեշտացնի փոխադրման գործընթացներն ու անցումները տարբեր երկրներով»,- ասել է նա։
Հավելենք, որ 2022 թվականի մարտի 31-ին Վրաստանը, Ադրբեջանը, Թուրքիան և Ղազախստանը ստորագրել են «Արևելք-Արևմուտք անդրկասպյան միջանցքի մասին» քառակողմ հռչակագիր, որում ընդգծվում է Արևելք-Արևմուտք անդրկասպյան միջանցքի կարևորությունը։ Առաջնահերթություններից մեկն էլ Բաքու-Թբիլիսի-Կարս երկաթուղու մրցունակությունը բարձրացնելն է և այդ գծի թողունակության մեծացման աշխատանքներն արագացնելը։
Իսկ ահա համատեղ ձեռնարկությունն ապահովելու է բարձր որակի տրանսպորտային ու լոգիստիկ ծառայություններ, ներդաշնակեցնելու է միջսահմանային սակագները և ներդնելու է միասնական ՏՏ հարթակ՝ Չինաստանից Թուրքիա և Սև ծովի նավահանգիստներ բեռնափոխադրումների ամբողջական ավտոմատացման համար:
Բացի այդ, նախատեսվում է միանալ Հյուսիս-Հարավ միջազգային բեռնափոխադրումների միջանցքի հետ՝ Կասպից ծովի նավահանգիստներով ընդլայնելով միջանցքը դեպի Իրան, Պարսից ծոցի արաբական երկրներ, Արևելյան Աֆրիկա և Հնդկաստան։
Էմմա Չոբանյան
