Ոստիկանները «լուսացույցի» դեր չեն խաղալու․ Ֆիդանյանը՝ մարզերում պարեկային ծառայության ներդրման մասին․ ՏԵՍԱՆՅՈՒԹ

Ոստիկանության բարեփոխումների շրջանակում առաջիկայում պարեկային ծառայության ներդրման ծրագրեր կիրականացվեն Շիրակի և Լոռու մարզերում: Ոստիկանության պետի տեղակալ Արա Ֆիդանյանը, այսօր հրավիրված ասուլիսում անդրադառնալով այդ ծրագրերի իրականացման ուղղությամբ ընթացող աշխատանքներին, տեղեկացրեց, որ 100 տրանսպորտային միջոց գտվում է Հայաստանում 40-ը ճանապարհին են:

«Ինչ վերաբերում է պարեկային ծառայողների թեկնածուներին, այս պահին վերապատրաստում է անցնում 549 թեկնածու, և ովքեր հաջողությամբ կհանձնեն ավարտական քննությունները և ստուգարքները, նրանք կնշանակվեն պարեկային ծառայության՝ Լոռու և Շիրակի ստորաբաժանումներում, նրանց մի մասն էլ համալրելու է Երևանի ստորաբաժանումը: Զուգահեռ աշխատանքներ են իրականացվում նաև մյուս 4 մարզերում պարեկային ծառայության ներդրման ուղղությամբ»,- նշեց Ֆիդանյանը:

ՀՀ ոստիկանության պետի տեղակալը նշեց, որ հանրապետության մարզերում պարեկային ծառայության ներդրման գործում հաշվի են առնվում Երևանի փորձն ու բացթողումները:

Նրա խոսքով՝ Երևանում պարեկային ծառայության ներդրման ժամանակ սկզբից որոշ խնդիրներ ի հայտ եկան, որոնք հաշվի են առնվում մյուս մարզերի պարագայում:

«Առաջին խնդիրը, որ ականատես եղանք հենց ճանապարհային երթևեկության անվտանգության ապահովման հետ էր կապված: Ի պատիվ մեր պարեկային ծառայողների պետք է նշեմ, որ նրանք շատ արագ արձագանքեցին, որ ամեն ինչ կանոնակարգվեց: Ամեն դեպքում, հասարակության շրջանում շարունակում է գեներացվել այն մոտեցումը, որ պարեկային ծառայության գործառույթը բացառապես ճանապարհային երթևեկության անվտանգության ապահովումն է: Պետք է նշեմ, որ այդպես չէ: Ոստիկանության ծառայողները լուսացույցի դեր չեն խաղալու ու չպետք է խաղան: Այդ ամբողջը պետք է կանոնակարգվի համապատասխան գործիքակազմերով: Օրինակ, խելացի տեսախցիկներով, խելացի լուսացույցներով և այլն»,-ասաց Արա Ֆիդանյանը:

Հաջորդ խնդիրը, որն ի հայտ էր եկել Երևանում պարեկային ծառայության ներդրման սկզբնական փուլում իրավական գիտելիքների առումով էր: Արա Ֆիդանյանի խոսքով՝ որքան էլ 5 ամսյա դասընթացը խտացված ներկայացվի, չի կարող բավարար լինել: Այդ նպատակով ներդրվում է պարբերաբար վերապատրաստման դասընթացների համակարգ, որ պարեկն աշխատանքի անցնելուց հետո էլ վերապատրաստվի:

Մյուս խնդիրը միմյանց հետո հաղորդակցությունն ապահովելու խնդիրն էր: Նոր տեխնոլոգիաների, նոր համակարգերի հետ կապված խնդիրներ կային: Արա Ֆիդանյանը նշեց, որ այժմ այդ խնդիրները հիմնականում կանոնակարգված են, մասնագետները աշխատանք են տանում կատարելագործելու այդ սպասարկող ծրագրերը:

Մանրամասները՝ տեսանյութում: