Քաղաքականություն
31.01.2022 | 14:42
Արցախյան 44-օրյա պատերազմից հետո մինչ օրս (2020թ․ նոյեմբերի 10-ից 2022-ի հունվարի 31-ը) Ադրբեջանի պաշտպանության և անվտանգության ոլորտը 110 զինվորականի կորուստ է գրանցել։ Այս մասին ասվում է Ռազմական հետազոտությունների Կասպյան ինստիտուտի հաղորդագրության մեջ, գրում է «Թուրան» գործակալությունը։
Ինստիտուտի տվյաներով՝ 15 զինծառայող զոհվել է հայկական կողմի գնդակից, 10-ը՝ պայթել ականի վրա, մյուսները մահացել են ոչ մարտական պայմաններում։ Զինվորականների մահվան դեպքերի մեծ մասը հաստատել են Ադրբեջանի ՊՆ-ն ու ուժային այլ գերատեսչություններ։
Նշվում է, որ 14 զինծառայող մահացել է ուղղաթիռի վթարի հետևանքով, 12-ը՝ ավտովթարների, 12-ը՝ այլ դժբախտ պատահարների, 10-ը մահացել է հիվանդություններից, 9-ը՝ անհայտ պատճառներից, ևս 9-ը՝ պատերազմում ստացած վիրավորումից, 5-ը՝ ոչ կանոնադրական հարաբերությունների արդյունքում, 2-ը` հատուկ գործողությունների ժամանակ, 12 զինվորական ինքնասպանություն է գործել։
Ընդհանուր կորուստներից 84-ը, այդ թվում՝ 11-ը մարտական և 73-ը՝ ոչ մարտական, եղել է 2021 թվականին։
2022 թվականի հունվարին ադրբեջանական բանակը 11 զինվորական է կորցրել, այդ թվում՝ մեկ զինծառայող զոհվել է հայկական կողմի արձակված գնդակից, 3-ը՝ ոչ կանոնադրական հարաբերությունների, 2-ը՝ անհայտ պատճառներով, 3-ը՝ հիվանդությունից, 1-ը՝ դժբախտ պահատարից, ևս մեկն ինքնասպանություն է գործել։
Ռազմական հետազոտությունների կասպյան ինստիտուտը նշում է կորուստների աճի միտման մասին, հատկապես՝ ոչ մարտական պայմաններում։
Էմմա Չոբանյան
