Ղազախստանի անվտանգության ուժերը անհամաչափ ուժ են կիրառել ցուցարարների նկատմամբ․ HRW

Վերջին ցույցերի և դրան հաջորդած քաղաքացիական անկարգությունների ժամանակ Ղազախստանի անվտանգության ուժերը անհամաչափ ուժ են կիրառել առնվազն չորս անգամ, ներառյալ՝ մահաբեր ուժ, ինչպիսին են կրակոցները ցուցարարների և անկարգությունների մասնակիցների ուղղությամբ, հայտնում է Human Rights Watch-ը: Ըստ այդմ՝ Ղազախստանի ամենամեծ քաղաքում՝ Ալմաթիում, 2022 թվականի հունվարի 4-ից 6-ը գրանցված ավելի քան 80 ստուգված տեսանյութերի վերլուծությունը ընդգծում է արդյունավետ, անկախ և անաչառ հետաքննության հրատապ անհրաժեշտությունը:

Կազմակերպության կողմից վերլուծության ենթարկված տեսանյութերից մեկում առկա է մի միջադեպի դրվագ, որը հանգեցրել է 10 մարդու սպանության, 19 հոգի վիրավորվել է: Հունվարի 15-ին Ղազախստանի դատախազությունը հայտարարել էր, որ հունվարի 4-ից 225 մարդու դիակ, այդ թվում՝ անվտանգության ուժերի 19 անդամների, հանձնվել են դիահերձարաններ։

«Բազմաթիվ ապացույցներ կան, որոնք ցույց են տալիս, որ անվտանգության ուժերը կրակ են բացել առանց որևէ ակնհայտ հիմնավորման և սպանել առնվազն 10 մարդու», – ասում է Human Rights Watch-ի հակամարտությունների և ճգնաժամերի հետազոտող Ջոնաթան Պեդնոն: « Բռնաճնշումների հետևանքով զոհերի թիվը, հավանաբար, շատ ավելի մեծ է և պահանջում է արագ և արդյունավետ հետաքննություն»:

Human Rights Watch-ը ստուգել և վերլուծել է ավելի քան 80 տեսանյութ, որոնց մեծամասնությունը նկարահանվել է Ալմաթիում հունվարի 4-ից 6-ը տեղի ունեցած իրադարձությունների մասնակիցների կամ ականատեսների կողմից և տարածվել Telegram-ում, Twitter-ում, Facebook-ում կամ YouTube-ում: Դրանցից 9-ը նկարահանել են Agence France-Presse-ի լրագրողները, 1-ը տեղադրվել է համացանցում Ղազախստանի կառավարության լրատվական ծառայության կողմից: Տեղացի լրագրողները ևս մեկ տեսանյութ ուղարկել են անմիջապես Human Rights Watch-ին:

Տաթև Ֆռանգյան