20.05.2026 | 15:31
ՄԻՊ-ը կոչ է անում բացառել խտրական և ատելություն տարածող խոսույթը քարոզարշավում
Բելառուսում 5 արտասահմանյան հեռուստաալիք դադարեցրել է հեռարձակումը
Քաղաքականություն
11.01.2022 | 22:12
Բելառուսում հինգ արտասահմանյան հեռուստաալիք դադարեցրել է հեռարձակումը։ Այս մասին, DW-ի փոխանցմամբ, հայտնում է ԲելՏԱ պետական լրատվական գործակալությունը՝ վկայակոչելով երկրի տեղեկատվության նախարարությանը։
«Արտասահմանյան հեռուստահաղորդումները Ultra 4K Extreme, Ded Moroz TV Channel, Bridge TV Classic, Bridge TV Dance և Your Home with Your Hands դուրս են մնացել Բելառուսի Հանրապետության տարածքում թույլատրված հեռարձակման ցանկից՝ նախկինում տրված թույլտվությունների ժամկետը լրանալու պատճառով: Նոր թույլտվություններ ստանալու համար իրավասու անձինք չեն դիմել տեղեկատվության նախարարություն»,- մեջբերում է գործակալությունը նախարարության հաղորդագրությունը։
Բելառուսում հեռարձակման արտոնագրված արտասահմանյան ալիքների թիվը վերջին մի քանի ամիսների ընթացքում նվազում է։ 2021 թվականին Բելառուսում դադարեցրել են հեռարձակումները ռուսական RTVI, Russian Musicbox և Mama հեռուստաալիքները։ Բացի այդ, 2021 թվականի գարնանը երկրում դադարեցրեց հեռարձակումը Euronews հեռուստաալիքը։
Սրա պաշտոնական պատճառը գովազդի մասին օրենքի խախտումն էր, որը հեռուստաալիքով հեռարձակվում էր ոչ միայն բելառուսերենով և ռուսերենով, այլև անգլերենով։
2021 թվականի ամռանը Բելառուսում խուզարկություններ են իրականացվել մի շարք իրավապաշտպանների, հասարակական կազմակերպությունների աշխատակիցների և լրագրողների, այդ թվում՝ լեհական Belsat հեռուստաալիքի և «Ազատություն» ռադիոկայանի նկատմամբ։ 2021 թվականի հուլիսի վերջին Բելառուսի իշխանությունները «ծայրահեղականի» կարգավիճակ են շնորհել Belsat հեռուստաալիքին։ 2021 թվականի նոյեմբերի կեսերին BelaPAN լրատվական գործակալությունը և երկրի ամենահին թերթը՝ Nasha Niva-ն, նույնպես ճանաչվեցին որպես «ծայրահեղական կազմակերպություն»։
2021 թվականի հոկտեմբերին «Կոմսոմոլսկայա պրավդա» թերթը փակեց իր ներկայացուցչությունը Բելառուսում, իսկ 2022 թվականի հունվարի 1-ից «Ինտերֆաքս-Արևմուտք» լրատվական գործակալությունը նույնպես դադարեցրեց իր աշխատանքը երկրում։
Տաթև Ֆռանգյան
