«Դեռ որքա՞ն պիտի ապրեցնենք այն պատրանքը, թե Թուրքիան կարող է ԵՄ անդամ դառնալ». Քեթի Փիրի

Եվրոպական խորհրդարանի (ԵԽ)՝ Թուրքիայի հարցերով զեկուցող Քեթի Փիրին անդրադարձել է Թուրքիայի եվրաինտեգրման հեռանկարներին։ Հոլանդացի պատգամավորը մտահոգություն է հայտնել, որ չնայած մարդու իրավունքների և խոսքի ազատության ոտնահարման բազմաթիվ դեպքերին՝ Թուրքիա-ԵՄ բանակցությունները դեռևս չեն դադարեցվել. փոխանցում է ermenihaber-ը:

Փիրին հիշեցրել է, որ մի շարք պատգամավորներ, լրագրողներ և անգամ ԵՄ երկրների քաղաքացիներ դեռևս անազատության մեջ են գտնվում Թուրքիայում։ Իսկ Թուրքիայի նախագահ Ռեջեփ Թայիփ Էրդողանը, չնայած այս ամենին, դեռ երազում է Եվրամիությանն անդամակցելու մասին։ Եվրահանձնաժողովն էլ, իր հերթին, չի դադարեցնում Թուրքիայի հետ հարաբերությունները՝ դրանով իսկ նպաստելով այդ երազանքի գոյատևմանը։

Ըստ պատգամավորի՝ Եվրամիությունը Թուրքիայի հետ կապված շահեր ունի, այդ պատճառով էլ Բրյուսելը դեռ բանակցությունների սկզբից ամեն կերպ ջանում է Թուրքիային ավելի մոտեցնել Եվրոպային։  Բայց չնայած դրան՝ այդ բանակցությունները շատ մեծ դժվարությամբ են առաջ ընթանում։

«Իրավիճակն այսպիսին է․ իմ 10 գործընկերները բանտարկված են։ Թուրքիան 6-րդ երկիրն է աշխարհում, որտեղ ամենից շատ լրագրողներ են բանտարկված։ Հեղաշրջման փորձից հետո 150․000 մարդ հեռացվեց աշխատանքից, 50․000 մարդ կալանավորվեց։ 2 շաբաթ առաջ Թուրքիայի վերջին անկախ մեդիա խումբը վաճառվեց Էրդողանի ընկերոջը։ Եկող տարի ուժի մեջ կմտնեն սահմանադրական փոփոխությունները և Էրդողանի լիազորություններն էլ ավելի կընդլայնվեն։

Իմ հարցը հետևյալն է․ նման պայմաններում մենք դեռ որքա՞ն պետք է ապրեցնենք այն պատրանքը, թե Թուրքիան հնարավորություն ունի ԵՄ անդամ դառնալու», – ասել է Փիրին։