«Ռուսաստանի անընդունելի ու վտանգավոր վարքագիծը գին և հետևանք կունենա». ՆԱՏՕ-ն ևս ռուս դիվանագետների է արտաքսել

ՆԱՏՕ-ի գլխավոր քարտուղար Յենս Սթոլթենբերգը երեկ հայտարարել է, որ 7 դիվանագետի է արտաքսելու ռուսական առաքելությունից և մերժելու է ևս 3-ի հավատարմագրումը՝ այդպիսով 30-հոգանոց ռուսական առաքելությունը հասցնելով 20-ի. փոխանցում է bbc.com-ի ռուսական ծառայությունը:

Ավելի վաղ, 27 երկրներ «Սկրիպալի» գործի առնչությամբ, հայտնել էին իրենց երկրներից ռուս դիվանագետների արտաքսման մասին՝ ի համերաշխություն Մեծ Բրիտանիայի:

«Այս քայլով մենք Ռուսաստանին հստակ հասկացնել ենք տալիս, որ նրա անընդունելի ու վտանգավոր վարքագիծը գին և հետևանք կունենա: Եվ սա պատասխանն է Սոլսբերիում տեղի ունեցածի առնչությամբ Ռուսաստանի ոչ կառուցողական արձագանքի», – ասել է Յենս Սթոլթենբերգը:

«Ես կարծում եմ, որ Ռուսաստանը թերագնահատել է ՆԱՏՕ-ի դաշնակիցների միասնականությունը», -հավելել է դաշինքի գլխավոր քարտուղարը:

Նշենք, որ ՆԱՏՕ-ն ռուս դիվանագետների էր արտաքսել նաև Ղրիմի բռնակցումից հետո:

Հիշեցնենք, որ մարտի 5-ին Սոլսբերի քաղաքի  ոստիկանությունը հաղորդել էր, որ քաղաքի առևտրի կենտրոններից մեկում անհայտ ծագման վտանգավոր նյութից անգիտակից վիճակում  հիվանդանոց է տեղափոխվել երկու անձ։ Հետագայում պարզվել է, որ խոսքը Սկրիպալի և նրա դստեր մասին է:

Նշենք նաև, որ Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին ապաստան էր ստացել Մեծ Բրիտանիայում. նրան  փոխանակել են ԱՄՆ-ում ձերբակալված ռուս գործակալների հետ: