Արմենուհի Կյուրեղյանը նախազգուշացում ստացավ ոչ պատշաճ բառապաշարի համար. ՏԵՍԱՆՅՈՒԹ

«Հայաստան» խմբակցության պատգամավոր Արմենուհի Կյուրեղյանին այսօր ԱԺ-ում նկատողություն հայտարարվեց ոչ պատշաճ բառապաշարի համար:

Նշենք, որ ՀՀ վարչապետ Նիկոլ Փաշինյանը, ի պատասխան Արմենուհի Կյուրեղյանի հարցադրման, Ազգային ժողովի ամբիոնից կրկին հայտարարեց, որ պատերազմում ամեն ինչի մեղավորն էլ, պատասխանատուն էլ ինքն է և ընդգծեց, որ այդ մասին հարյուր անգամ արդեն ասել է:

Կյուրեղյանն արձագանքեց՝ ընդգծելով. «Միևնույն է Ձեզ և՛ դավաճան են անվանում, և՛ կապիտուլյանտ»:

Վարչապետը պատասխանեց, թե ընդդիմությանն ավելի մեծ դավաճան ու կապիտուլյանտ են անվանում, և ընտրությունների արդյունքները  դրա մասին են վկայում:

«Ձեր դավաճան ու կապիտուլյանտ լինելու մասին, կարծում եմ, առաջիկայում ավելի մանրամասն քննարկումներն կունենանք:

Ես,այո,ինձ մեղավոր եմ ճանաչում, այդ թվում՝ բանակը կոռումպացված տարրից չազատելու համար 2018 թվականից հետո:

Ձեր խմբակցության անդամ կա, որ անընդհատ հոկտեմբերի 7-ի մասին է խոսում անհեթեթ բաներ: Հոկտեմբերի 7-ի առաջարկն ընդունվել է, պայմանավորվածությունը ձեռք է բերվել, որի արդյունքով Հայաստանի ԱԳ նախարարը Ադրբեջանի ու ՌԴ ԱԳ նախարարների հետ ստորագրել է փաստաթուղթ, որը հրապարակվել է:

Կյուրեղյանը տեղից միջամտեց, վարչապետն ընդհատեց խոսքը և հեռացավ ամբիոնի մոտից, ինչից հետո էլ Արմենուհի Կյուրեղյանին նկատողություն հայտարարվեց ոչ պատշաճ բառապաշարի համար: