Քաղաքականություն
15.09.2021 | 21:06
Սեպտեմբերի 14-ին հանդիպեցի Հարավային Կովկասի եւ Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարի գլխավորած պատվիրակության հետ: Այս մասին իր ֆեյսբուքյան էջում հայտնել է «Իմ քայլը» պատգամավոր Էդուարդ Աղաջանյանը
Հանդիպմանը ներկա էին նաեւ ԱԺ արտաքին հարաբերությունների մշտական հանձնաժողովի անդամ Մարիա Կարապետյանը եւ Հայաստանում ԵՄ պատվիրակության ղեկավար, դեսպան Անդրեա Վիկտորինը:
Նշեցի, որ Հայաստանը բարձր է գնահատում ԵՄ-ի հետ համագործակցությունը, ինչպես նաև ընդգծեցի պատերազմի ընթացքում եւ դրանից հետո խաղաղության գործընթացի վերականգնման հարցում ԵՄ-ի ջանքերը:
Հանդիպման ընթացքում անդրադարձ կատարվեց տարածաշրջանում խաղաղության պահպանմանը և այս համատեքստում նշեցի, որ Հայաստանը պատրաստ է անել գործուն քայլեր տարածաշրջանում երկարաժամկետ խաղաղություն հաստատելու համար, սակայն ադրբեջանական զինված ուժերի ներխուժումը ՀՀ ինքնիշխան տարածք, Ադրբեջանում հայ ռազմագերիների եւ պահվող այլ անձանց առկայությունը չեն նպաստում տարածաշրջանում խաղաղության վերահաստատմանը:
Կարեւորեցի եվրոպացի գործընկերների դերակատարությունը, մասնավորապես ճնշում գործադրելը Ադրբեջանի վրա` ԵԱՀԿ Մինսկի խմբի համանախագահության հովանու ներքո վերադառնալու բանակցությունների գործընթացին:
ԵՄ հատուկ ներկայացուցիչ Տոյվո Կլաարը նշեց, որ ԵՄ-ն ցանկանում է նպաստել տարածաշրջանում խաղաղության հաստատմանը:
Քննարկեցինք նաեւ ՀՀ-ԵՄ համագործակցության օրակարգին վերաբերող մի շարք հարցեր:
