16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Ղազախստանի խորհրդարանի պատվիրակության անդամներն այցելել են Արցախի գրավյալ Շուշի քաղաք
Քաղաքականություն
13.09.2021 | 14:22
Ադրբեջանում գտնվող Ղազախստանի Մեջլիսի պատվիրակությունը խորհրդարանի միջազգային կապերի, պաշտպանության ու անվտանգության հանձնաժողովի նախագահ Այգուլ Կուսպանի գլխավորությամբ նախօրեին այցելել է Արցախի գրավյալ՝ Շուշի ու Վարանդա քաղաքներ։
Ադրբեջանական լրատվամիջոցների տեղեկություններով՝ ղազախական պատվիրակությանն ուղեկցել են Ադրբեջանի Միլլի Մեջլիսի փոխնախագահը, Ադրբեջան-Ղազախստան միջխորհրդարանական աշխատանքային խմբի ղեկավար Ադիլ Ալիևն ու միջազգային հարաբերությունների ու միջխորհրդարանական կապերի հանձնաժողովի նախագահ Սամեդ Սեիդովը։
Ղազախական պատվիրակության անդամներն այցելել են հայկական Շուշիի պատմամշակութային վայրեր։ Վարանդայում էլ նրանք այցելել են նոր կառուցվող օդանավակայան, ինչպես նաև ծանոթացել նոր ենթակայանի աշխատանքին։
Հիշեցնենք, որ Ադրբեջանի իշխանությունները պարբերաբար Արցախի գրավյալ քաղաքներ ու հատկապես Շուշի, տարբեր երկրների պաշտոնյաների քարոզչական ուղևորություններ են կազմակերպում։
Ավելի վաղ Ադրբեջանում հավատարմագրված տարբեր երկրների դեսպաններն էին այցելել Շուշի, որին արձագանքել էր նաև ՀՀ ԱԳՆ-ն։ Հայաստանի արտաքին գերատեսչություն էին հրավիրվել համապատասխան դիվանագիտական առաքելությունների ղեկավարները։ Դեսպաններին փոխանցվել էին նրանց երկրների կառավարություններին ուղղված հայտագրեր։
Պաշտոնական Երևանը ղազախական պատվիրակության Շուշի այցին դեռևս չի արձագանքել։ Ի դեպ, սեպտեմբերի 11-ին էլ Հայաստանի արտաքին գործերի նախարար Արարատ Միրզոյանն ընդունել էր ՀՀ-ում Ղազախստանի դեսպան Բոլատ Իմանբաևին։
Էմմա Չոբանյան
