23.11.2024 | 11:00
Հոկտեմբերին եկամուտ ստացող աշխատատեղերի թվաքանակը կազմել է 779 151․ ՊԵԿ
Թուրքիան էլի խաբելու է. Գագիկ Մելքոնյանը՝ այդ երկրի հետ հարաբերությունները կարգավորելու մասին. ՏԵՍԱՆՅՈՒԹ
Քաղաքականություն
08.09.2021 | 18:01
Այն ամենը, ինչ կապված է բանակի հետ, պետք է լինի գաղտնի: Այս մասին Factor.am-ի հետ զրույցում նշեց պաշտպանության նախկին փոխնախարար, «Քաղաքացիական պայմանագիր» խմբակցության պատգամավոր Գագիկ Մելքոնյանը՝ հավելելով, որ առաջնային խնդիրը երկրի անվտանգությունն է, բանակի վերակառուցումն ու վերազինումը:
Մելքոնյանի դիտարկմամբ՝ գաղտնի պետք է լինի նաև գերիների վերադարձի հետ կապված հարցը. «Եթե հիշում եք՝ մեր ինքնաթիռը ամիսներ առաջ գնաց Ադրբեջան, դատարկ հետ եկավ: Դա ինչի՞ հետևանք էր, այն բանի հետևանք էր, որ նախօրոք հայտարարեցին, թե գերիները վերադառնալու են և այլն, և դա ի՞նչ արձագանք ստացավ ժողովրդի մեջ: Ավելի լավ է լռել: Գերիների հարցը նույնպես ես համարում եմ գաղտնիք, որովհետև արդեն փորձ ունենք, որ նախօրոք գերիների վերադարձի մասին խոսք գնաց, ու Ադրբեջանը չվերադարձրեց»:
«Հակառակորդն ամեն ինչ անում է, որ մեր ներքաղաքական իրավիճակը բարդացնի, ժողովրդին հանի իշխանությունների դեմ, մենք պետք է միասնական դառնանք, որ կարողանանք նաև գերիներին հետ բերել: Մենք պահանջում ենք կատարել «գերիները գերիների դիմաց» պայմանը: Մենք պետք է հասկանանք, որ ամեն ինչի մասին չէ, որ պետք է հրապարակվի: Միջազգային կառույցները և մեր իշխանությունները զբաղվում են գերիների հարցով, մեր խնդիրն է, որ մեր տղաներին վերադարձնենք»:
Կառավարության նիստում վարչապետ Նիկոլ Փաշինյանն անդրադարձավ Հայաստանի հետ հարաբերությունները կարգավորելու վերաբերյալ Թուրքիայի նախագահի հայտարարություններին և նշեց, որ հայկական կողմը պատրաստ է նման խոսակցության: Անդրադառնալով այս դիտարկմանը՝ Գագիկ Մելքոնյանը նշեց. «Թուրքիան էլի խաբելու է: Էրդողանն ուզում է ցույց տալ, որ բարի հարևան է: Բայց հիշենք՝ սկսած «ֆուտբոլային դիվանագիտությունից»՝ ի՞նչ եղավ: Ցյուրիխում պայմանագիր կնքվեց, որ թշնամությունը պետք է վերանա, կետեր նշվեցին, բայց իրենք նորից պայմանավորվածությունը չպահեցին: Թուրքիան երբեք չի ուզենա, որ մեր երկիրը հզորանա, այլ կուզենա, որ վատ, աղքատ վիճակում լինի, որ կարողանա խոսել ուժեղի դիրքերից: Թուրքիան ինչ էլ ասի, մեզ խաբելու է: Դա իմ կարծիքն է: Ես ամբողջ կյանքում տեսել եմ, որ թուրքը երբեք մեզ բարեկամ չի դառնա, կարող է ինչ-որ բանով հետաքրքրվել, գայթակղել, բայց չի կարող դառնալ այն երկիրը, որը կցանկանա մեր երկրի բարգավաճումն ու հզորացումը»:
Մանրամասները՝ տեսանյութում:
