Մեծ Բրիտանիայում խանութների դարակաշարերի մեծ մասն արդեն մի քանի շաբաթ է՝ դատարկ է

Մեծ Բրիտանիան բախվել է տրանսպորտային ծանր ճգնաժամի, ինչին հաջորդել է ապրանքային ճգնաժամը: Խանութների դարակաշարերի մեծ մասն արդեն մի քանի շաբաթ է դատարկ են, գրում է Euronews-ը:

«Գլխավոր խնդիրներից մեկը բեռնատարների վարորդների պակասն է։ Բացի այդ, բյուրոկրատիան ու թղթաբանությունը։ Անհրաժեշտ է շուտափույթ կերպով ադապտացնել օրենքներն ու դրա հետ կապված ամեն բան։ Այդ բոլոր խնդիրները միասին հանգեցրել են դարակաշարերի դատարկմանը»,- Euronews-ին ասել է խանութներից մեկի ղեկավար Մեթ Հարգրիվզը։

Երկրում բեռնափոխադրողների խնդիր արդեն վաղուց կա։ «Բրեքսիթից» հետո երկրից հեռացել են Եվրոպայից աշխատողները, ինչը միայն խորացրել է ճգնաժամը։

«Ժամանակակից մատակարարման շղթաները շատ բարդ կառույցներ են` հսկայական քանակությամբ շարժական մասերով: Եթե այս համակարգի ինչ-որ տարր չի գործում այնպես, ինչպես պետք է, էլ չասած, երբ միանգամից մի քանի վայրում են խնդիրներ առաջանում, ապրանքների պակասուրդ է առաջանում․ այժմ հենց դա է տեղի ունենում: Եվ այսպես, ըստ երևույթին, դեռ երկար կլինի. պատճառը Covid-ն է, «Բրեքսիթը»,-ասում է Դեյվիդ Հենիգը՝ Քաղաքական տնտեսության եվրոպական կենտրոնի անդամներից մեկը։

Բանն այն է, որ շուրջ 20 000 բեռնափոխադրող եվրոպացի հեռացել է երկրից «բրեքսիթից» հետո, իսկ նոր օտարերկրացիներ ներգրավելը չափազանց բարդ է փոփոխված կանոնների ու պահանջների պատճառով։ Նույն խնդիրները առկա են մայրցամաքի այլ երկրներում ևս։

Տաթև Ֆռանգյան