Թալիբները տարհանման կենտրոնի ճանապարհին ծեծել են բրիտանացուն և նրա կնոջը

Մեծ Բրիտանիայի քաղաքացուն և նրա կնոջը Աֆղանստանից տարհանման կենտրոնի ճանապարհին թալիբները ծեծել են։ Korrespondent.net-ի փոխանցմամբ՝ այս մասին օգոստոսի 20-ին հայտնել է Independent թերթը։

Տուժած բրիտանացու խոսքով՝ ինքը դեսպանատնից էլեկտրոնային փոստով նամակ է ստացել հրահանգով, որ իրեն պետք է Քաբուլի հյուրանոց հասնել տարհանման թռիչքի համար:

Առաջին անցակետում թալիբները դաժանորեն ծեծել են նրան և կնոջը՝ հրահանգելով վերադառնալ։

«ԱԳՆ-ից մարդիկ մեզ հրահանգում են գնալ Baron հյուրանոց, բայց դրա ճանապարհին թալիբների երեք անցակետ կա… Մենք նրանց ցույց տվեցինք մեր փաստաթղթերը, էլեկտրոնային նամակները, ԱԳՆ-ից ստացված տեղեկությունները, բայց թալիբները մեզ վրա հարձակվեցին, քանի որ գիտեին, որ մենք փախչում ենք երկրից: Մենք պետք է իմանանք, թե ինչ է տեղի ունեցել: Նրանք ասել են, որ հյուրանոց հասնելու ոչ մի միջոց չկա, և որ մենք պետք է վերադառնանք, կամ նրանք կկրակեն», – ասել է տղամարդը։

Նա նաև հայտարարել է, որ դժվարություններ են առաջանում նաև օտարերկրացիների՝ Քաբուլի օդանավակայան մեկնելիս: Նրա խոսքերով՝ օդանավակայան անարգել մուտք են գործում միայն ամերիկացիները:

Հիշեցնենք, որ Աֆղանստանից ԱՄՆ-ի զորքերի դուրսբերումից հետո «Թալիբան» շարժումը հարձակում էր սկսել կառավարական ուժերի վրա և մինչև օգոստոսի 15-ը մտել Քաբուլ՝ հայտարարելով իշխանության զավթման մասին:

Աֆղանստանի նախագահ Աշրաֆ Գանին հեռացել է երկրից: Արևմտյան պետությունները տարհանում են իրենց քաղաքացիներին, այդ թվում ՝ դիվանագետներին։