16.12.2025 | 10:06
Տեղի է ունեցել պրոբացիայի և քրեակատարողական ոլորտին առնչվող հարցերի քննարկման միջգերատեսչական հանձնաժողովի անդրանիկ նիստը
Հունաստանը չի պատրաստվում Թուրքիայի հետ զինվորների փոխանակում անել
Քաղաքականություն
05.03.2018 | 19:39
Հունաստանը հերքել է Թուրքիայի հետ զինվորների փոխանակման հավանականության մասին լուրերը. փոխանցում է EH-ն:
Խոսքը 2016թ․ հեղաշրջման փորձից հետո Հունաստանում ապաստանած թուրք սպաների և մարտի 1-ին թուրքական սահմանը հատած երկու հույն զինվորականների մասին է։
Հունաստանի արտաքին գործերի փոխնախարար Յորգոս Կատրուգալոսը հայտարարել է, որ Թուրքիայի հետ զինվորների փոխանակում հնարավոր չէ։ «Այդ լուրը լիովին մտացածին է։ Մենք Թուրքիայի հետ պատերազմի մեջ չենք, որ ռազմագերիներ փոխանակենք»,- նշել է նա։
Հույն փոխնախարարն ընդգծել է, որ նման դեպքերը սահմանին հաճախ են տեղի ունենում։ Իսկ զինվորների փոխանակման լուրը, ըստ նրա, տարածվել է թուրքական մամուլի կողմից։
Հույն զինվորականները թուրք-հունական սահմանի վրա գտնվող Կաստանիես անցակետի աշխատակիցներն են, ովքեր եղանակային վատ պայմանների պատճառով մոլորվել և սխալմամբ հատել էին թուրքական սահմանը:
Թուրքիայի անվտանգության աշխատակիցները նրանց հայտնաբերել և ձերբակալել էին թուրք-հունական սահմանին գտնվող Էդիրնե անցակետում։ Նրանք մեղադրվել են լրտեսության և արգելված գոտի մուտք գործելու մեջ։
Իսկ 2016թ․ հուլիսի 15-ի հեղաշրջման փորձից հետո 8 թուրք սպաներ ուղղաթիռով փախել էին Հունաստան և քաղաքական ապաստան խնդրել։ Հաշվի առնելով Թուրքիայում մարդու իրավունքների վիճակը՝ Հունաստանը մինչ օրս մերժում է նրանց արտահանձնելու Թուրքիայի պահանջը։
