12.12.2025 | 23:31
Պուտինի օգնականը չի բացառել պատերազմի ավարտից հետո Դոնբասի ապառազմականացումը
Բաքվում շիրակցի 13 ռազմագերիների շինծու քրգործով հերթական դատական նիստը հետաձգվել է
Քաղաքականություն
12.07.2021 | 13:44
Բաքվի ծանր հանցագործությունների դատարանում այսօր նշանակված էր շիրակցի 13 ռազմագերիների նկատմամբ հարուցված շինծու քրեական գործով հերթական նիստը, որը, սակայն, հետաձգվել է։ Այս մասին հաղորդում են ադրբեջանական լրատվամիջոցները։
Նիստը պետք է տեղի ունենար դատավոր Ազադ Մեջիդովի նախագահությամբ, սակայն հայտարարվել է, որ «մեղադրյալներից մեկի փաստաբանը ներկա չէ»։ Հաջորդ նիստը նշանակվել է հուլիսի 26-ին։ Այսօրվա նիստին, ի դեպ, սպասվում էր դատախազի ելույթը։
13 հայ ռազմագերիներն են՝ Ռաֆիկ Կարապետյանը, Հրայր Թադևոսյանը, Գուրգեն Գալոյանը, Վաղարշակ Մալոյանը, Սասուն Եղիազարյանը, Արսեն Վարդանյանը, Վահագն Բաղրիկյանը, Սեդրակ Սողոմոնյանը, Արման Դիլանյանը, Մանուկ Մարտոնյանը, Մելս Անբարտանյանը, Անդրանիկ Միքայելյանը, Ֆելիքս Գրիգորյանը։ Նրանց գործով նախորդ դատական նիստը տեղի էր ունեցել հուլիսի 5-ին։
Գերիների այս խմբի շինծու քրեական գործով առաջին նիստը տեղի է ունեցել հունիսի 23-ին, ևս մեկը՝ հուլիսի 1-ին։ Այս նիստում դատախազն ընթերցել էր մեղադրական եզրակացությունը, ըստ որի՝ հայ գերիները, իբր, «անօրինական կերպով ձեռք են բերել զենք, զինամթերք, պայթուցիկ նյութեր և ստեղծել զինված խմբավորում, անօրինական կերպով նոյեմբերի 17-ին անցել են պետական սահմանն ու գտնվել Հադրութի անտառներում»։
Նշենք նաև, որ նախորդ շաբաթ ևս երկու խումբ հայ ռազմագերիների դատական նիստեր էին հետաձգվել՝ փաստաբանի բացակայության պատճառով։
Հիշեցնենք, որ Հադրութի Հին Թաղեր ու Խծաբերդ բնակավայրերում դեկտեմբերին, ռազմական գործողությունների ավարտից հետո, Շիրակի մարզի տարբեր համայնքներից 62 զինծառայողներ գերեվարվեցին Ադրբեջանի կողմից։ Նրանց նկատմամբ Ադրբեջանի իշխանությունները տարբեր քրեական գործեր են հարուցել, որակել են դիվերսանտներ ու հրաժարվում են վերադարձնել։
Էմմա Չոբանյան
