18.12.2025 | 12:34
Վրաստանն արգելել է իր քաղաքացիներին քվեարկել արտասահմանում գտնվելու ընթացքում
Նպատակ ունեինք Արցախում հետպատերազմյան տրամադրություն փոխելու՝ ցույց տալու համար, որ կյանքը շարունակվում է․ Արտակ Բեգլարյան
Հասարակություն
04.07.2021 | 16:20
Արցախի Հանրապետության պետական նախարար Արտակ Բեգլարյանը հուլիսի 3-ին ողջույնի խոսքով է հանդես եկել Ստեփանակերտում մեկնարկած «Tech week Արցախ 2021» համաժողովի բացման արարողության ժամանակ:
Այս մասին հայտնում են Արցախի Կառավարությունից։
«Պետական նախարարը շնորհակալություն է հայտնել կազմակերպիչներին այդ խոշոր տեխնոլոգիական միջոցառումը Արցախում կազմակերպելու իր առաջարկն ընդունելու համար:
«Այս խոշորագույն տեխնոլոգիական միջոցառումն Արցախում կազմակերպելիս մի շարք նպատակներ ունեինք՝ ի լրումն նման միջոցառումների հիմնական նպատակների:
Մասնավորապես, նպատակ ունեինք Արցախում հետպատերազմյան տրամադրություն փոխելու՝ ցույց տալու համար, որ կյանքը շարունակվում է, և մենք պարտավոր ենք ջանքեր գործադրել առկա խնդիրների լուծման ու Հայրենիքի երկարատև զարգացման ուղղությամբ:
Հաջորդ նպատակը Հայաստանի Հանրապետությունում հետպատերազմյան տրամադրություն փոխելն է՝ խթանելով Արցախ այցելությունները և վիրավոր Արցախին աջակցելու գործնական ջանքերը:
Երրորդ նպատակը, անշուշտ, Արցախում տեղեկատվաղական տեխնոլոգիաների ոլորտի զարգացումն է՝ բարենպաստ պայմաններ ապահովելով տեղում համապատասխան կրթական ու գործարար ծրագրերի իրագործման համար:
Այժմ շատ ուրախ եմ, որ մեզ հաջողվել է կայացնել այս համաժողովը, և շնորհակալ եմ բոլոր կազմակերպիչներին, աջակիցներին ու մասնակիցներին»,- նշել է Արտակ Բեգլարյանը:
«Tech week Արցախ 2021» համաժողովին մասնակցում են ոլորտի շուրջ 1500 մասնագետներ ու հետաքրքրված անձինք, որից ավելի քան 400-ը ժամանել են ՀՀ-ից, ներառյալ՝ բնագավառի կայացած ընկերությունների ներկայացուցիչներ»,- աված է հայտարարության մեջ:
