30.06.2026 | 11:52
Բարձրաձայնել են 79 հազարից ավելի դեպքի մասին, որ անձնագիրը չի ընթերցվել ընտրության օրը․ փոխնախարար․ ՏԵՍԱՆՅՈՒԹ
10 բելառուս Գերմանիայում հայց է ներկայացրել ընդդեմ Ալեքսանդր Լուկաշենկոյի՝ մեղադրելով մարդկության դեմ հանցագործությունների մեջ
Քաղաքականություն
05.05.2021 | 22:28
Տասը բելառուսներ դիմել են Գերմանիայի Դաշնային դատախազություն՝ պահանջելով քրեական հետաքննություն սկսել Բելառուսի նախագահ Ալեքսանդր Լուկաշենկոյի և անվտանգության աշխատակիցների նկատմամբ՝ բողոքի ակցիաների բռնաճնշումների ժամանակ մարդկության դեմ կատարված հանցագործությունների համար, գրում է Reuters-ը:
Եվրոպայում բնակվող 10 բելառուսների հայցը դատարան ներկայացրած փաստաբանները մեջբերում են այն համընդհանուր օրենքները, որոնք թույլ են տալիս Գերմանիային դատապարտել մարդկության դեմ հանցագործությունները՝ աշխարհի որ հատվածում էլ դրանք իրականացված լինեն։
«Բոլոր հայցվորներն էլ պատմել են իրենց բանտարկության ժամանակ անհիմն ձերբակալությունների, խոշտանգումների ու բռնությունների մասին։ Հայցվորներից յուրաքանչյուրի առողջությանն անդառնալի հետևանքներ են հասցվել»,- հայտնել են փաստաբանները։
Լրատվականը նշում է, որ Մինսկն անմիջապես մեկնաբանություն չի տվել: Բելառուսի իշխանությունները ցուցարարներին բնութագրել են որպես հանցագործներ կամ բռնի հեղափոխականներ, որոնց աջակցում է Արևմուտքը, և իրավապահ մարմինների գործողությունները համարել են համարժեք և անհրաժեշտ:
Տաթև Ֆռանգյան
