Վահան Քերոբյանը հակադարձում է Ռոբերտ Քոչարյանին. ՏԵՍԱՆՅՈՒԹ

Ամեն օր ես կարող եմ պատմել մի քանի ներդրումների մասին: Հայաստանում մեծ թափով ներդրումներ են կատարվում: Այս մասին այսօր կառավարության նիստից հետո լրագրողների հետ ճեպազրույցում հայտնեց ՀՀ էկոնոմիկայի նախարար Վահան Քերոբյանը՝ հակադարձելով Ռ. Քեչարյանի հայտարարությանը, թե Հայաստանում գրեթե ներդրումներ չկան: Նախարարի խոսքով՝ այն մարդիկ, ովքեր փորձում են ֆոն ստեղծել, թե Հայաստանում ամեն ինչ վատ է, կապ չունեն իրական թվերի հետ:

Քերոբյանն ընդգծեց, որ Կառավարության օրակարգում Թուրքիայի հետ սահմանի բացման հարց առայժմ չկա: Նա տեղեկացրեց, որ երկարաձգվելու է թուրքական ապրանքների ներմուծման արգելքը։ «Ըստ ամենայնի՝ ավելացնելու ենք նաև վաճառքի արգելքը. կապ չունի, թե երբ է ներմուծվել, միևնույն է, սահմանափակելու ենք վաճառքը ևս, որովհետև որոշակի զարտուղի ճանապարհներով կարողանում են թուրքական ապրանք «մտցնել»։ Այստեղ մոտեցումը պետք է լինի բավականին սիմետրիկ, երբ քաղաքական մակարդակով կայացվի սիմետրիկ հարաբերությունները վերականգնելու որոշում, այդ ժամանակ արդեն կփորձենք այնպես անել, որ մեր տնտեսությունն ինչքան հնարավոր է լավ պաշտպանված լինի թուրքական ապրանքների հեղեղումից»,- ընդգծեց Վահան Քերոբյանը։

Նախարարը հավաստիացրեց, որ տարեվերջին երկնիշ տնտեսական աճ է գրանցվելու:

Հարցին, թե ինչ է անելու, եթե մինչև տարեվերջ խոստացած երկնիշ տնտեսական աճը չապահովվի, Քերոբյանը պատասխանեց. «Հրաժարական եմ տալու»:

Մանրամասները՝ տեսանյութում: