Բաքվի հետ ԵՏՄ մասնակցության հարցի քննարկումից առաջ նրանք պետք է վերադարձնեն բոլոր գերիներին․ Գևորգ Պապոյան․ ՏԵՍԱՆՅՈՒԹ

Հայաստանի տնտեսական իրավիճակի, նախընտրական գաղափարների մասին Factor TV-ն զրուցել է ԱԺ «Իմ քայլը» խմբակցության պատգամավոր, տնտեսագետ Գևորգ Պապոյանի հետ

-Պարո՛ն Պապոյան, սկսենք ապրանքների թանկացումից։ Հայաստանում մեծ ծավալի աղքատություն կա, և աղքատ մարդիկ իրենց միջոցները հիմնականում սննդի վրա են ծախսում։ Հիմա այս մարդիկ ձեթ և ալյուր պետք է գնեն, և այդ ապրանքները շատ թանկացել են։ Ի՞նչ անեն այս մարդիկ։

-Տեսեք՝ կոնկրետ ձեթի և ալյուրի օրինակը բերեցիք, որ երկնիշ աճով են թանկացել։ Բայց այստեղ պետք է հասկանանք, որ դրանց գնաճի պատճառն այն է, որ համաշխարհային շուկայում դրանց գներն աճել են։ Մասնավորապես, քովիդի պայմաններում արևածաղկի և հացահատիկի բերքի մշակման ծավալները որոշակի նվազել էին 2020-ին, որի հետևանքով այդ ապրանքների դեֆիցիտ առաջացավ, որը բերեց այդ ապրանքների գների աճի։ Այդ առումով, այո՛, ցավալի է, որ բարձր գնաճ ենք ունեցել, բայց, միևնույն ժամանակ, ես կարծում եմ, որ գները եթե ոչ նախկին մակարդակի, ապա էականորեն կիջնեն։

-Ձեր իշխանության գալու օրվանից, նույնիսկ դրանից առաջ էլ Հայաստանում քննարկվում էր Ամուլսարի հանքի հարցը։ Ըստ Ձեզ՝ ի՞նչ ապագա ունի Ամուլսարի հանքը։ 

-Ամուլսարի հանքի հարցով որևէ փոփոխություն դիրքորոշման մեջ չի եղել։

-Ընդհանուր առմամբ՝ դիրքորոշում էլ չի եղել։

-Կարծում եմ՝ ժամանակն է, որ մենք, կարծում եմ, տարվա ընթացքում կկողմնորոշվենք այդ հարցում։ Մոտեցումը հետևյալն է՝ հանքը պետք է բացվի, եթե բնապահպանական վնասներն այնպիսին չեն, որ անդառնալի են, կամ հանքի բերած օգուտները ավելի քիչ են, քան այն վնասները, որ կարող են տեղի ունենալ։ Եվ ընդհակառակը՝ հանքը չպետք է բացվի, եթե օգուտներն ավելի քիչ են։

-Բաքուն կարող է մասնակցել ԵՏՄ նիստին։ Ի՞նչ դիրքորոշում ունեք այս հարցում։

-Դիրքորոշման մասին տեղեկացված չեմ, անկեղծորեն կարող եմ ասել։ Բայց կարծեմ հրապարակվեց, որ Հայաստանն ունի առարկություններ։

-Առարկություններ՝ գերիների մասով։ Իսկ առհասարա՞կ։

-Ես կարծում եմ՝ այո, Բաքվի հետ ինչ-որ բան քննարկելուց առաջ նվազագույնը նրանք պետք է մեզ վերադարձնեն մեր բոլոր գերիներին։ Սա մեզ համար աներկբա է, և այդպես էլ պետք է լինի։

Հարցազրույցն ամբողջությամբ՝ տեսանյութում։

Գարիկ Հարությունյան