Քաղաքականություն
23.03.2021 | 14:19
Գերմանիան մինչև ապրիլի 18-ը երկարաձգել է կորոնավիրուսային համավարակով պայմանավորված սահմանափակումները և նորերն ավելացրել՝ փորձելով իջեցնել վարակման դեպքերի մակարդակը: Այս մասին հայտնում է Deutsche Welle-ն։
«Մենք նոր համավարակի մեջ ենք»,- ասել է Գերմանիայի կանցլեր Անգելա Մերկելը։
Նա հայտնել է, որ երկրում առավել խիստ սահմանափակումներ կգործեն ապրիլի 1-5-ը ՝ Սուրբ Զատկի տոնակատարության օրերին։
Ըստ երկրի իշխանությունների՝ COVID-ի դեպքերի թիվը հասել է այն մակարդակի, որ վերակենդանացման բաժանմունքները ծանրաբեռնվելու են:
Deutsche Welle-ի փոխանցմամբ՝ Գերմանիայում Սուրբ Զատկի տոնակատարության օրերին կգործեն հետևյալ սահմանափակումները․ եկեղեցական արարողություններն առցանց կանցկացվեն, կարգելվի հանրային հավաքների անցկացումը, փակ կլինեն գրեթե բոլոր խանութները՝ բացառությամբ մթերային խանութների, որոնք կարող են բացվել շաբաթ՝ ապրիլի 3-ին: Բացի այդ, Գերմանիայից դուրս գտնվող յուրաքանչյուր ոք, ով հանգստացել է արտասահմանում, պետք է հետազոտվի նախքան Գերմանիա վերադառնալը։
Նելլի Մելքոնյան
