Վլադիմիր Գասպարյանի՝ Սևանի ափին գտնվող տան քանդման հարցը կքննարկվի մի քանի տարուց. նախարար. ՏԵՍԱՆՅՈՒԹ

Փետրվարից մինչ օրս Սևանի ափամերձ տարածքներից ապամոնտաժվել են մոտ երեք տասնյակ շինություններ, որոնց այդտեղ գտնվելու վերաբերյալ իրավական փաստաթուղթ չկա։ Այս մասին, այսօր՝ մարտի 18-ին, կառավարության նիստից հետո լրագրողների հետ զրուցում հայտարարեց շրջակա միջավայրի նախարար Ռոմանոս Պետրոսյանը։

«Այս փուլում ապամոնտաժումը, քանդումը և ափից հեռացումը վերաբերում է բացառապես «Սևան ազգային պարկի» տնօրինման տակ գտնվող հողերի վրա առանց որևէ տեսակի իրավունքի, զոռբայության արդյունքում կառուցած դղյակներին, շենք-շինություններին, պարիսպներին, կցակառույցներին և տաղավարներին։ «Սևան ազգային պարկը»՝ որպես պետական ինստիտուտ, իր լիազորությունների և իրավասությունների շրջանակում իր տարածքները կարող է սահմանադրորեն ազատագրել և վերադարձնել իր տնօրինման տակ։ Որևէ փոխատուցման մասին խոսք լինել չի կարող»,- նշեց Ռոմանոս Պետրոսյանը։

Նախարարի խոսքով՝ հաջորդ փուլով կապամոնատժվեն կառուցապատման կամ վարձակալության որոշ թղթեր ունեցող տնտեսվարողների տարածքները, որոնք բոլոր դեպքերում կառուցված են իրավախախտումներով, մենք իրենց ծանուցելու ենք նախապես և ժամանակ ենք տրամադրելու՝ եթե իրենց ձեռքով իրենց ապօրինի շինությունները չեն ապամոնտաժի, այդ դեպքում՝ արդեն օրենքով սահմանված կարգով «Սևան ազգային պարկը» սեփական միջոցներով կապամոնտաժի և դատական կարգով բռնագանձման հայց կներկայացնի դատարան՝ բռնագրավելու այն միջոցները, որոնք ծախսվել են ապամոնտաժելու վրա»,- ասաց նախարարը։

Ըստ նախարարի՝ երրորդ փուլով, երբ հերթը հասնի թույլատրելի նիշից ներքև կառուցված, բայց պետական գրանցում ունեցող տիրապետմանը, այդ ժամանակ փոխհատուցման հարց կարող է քննարկվել․ «Դա պետք է վիճարկենք բացառապես դատական կարգով և օրենքով սահմանված այլ ընթացակարգերով»։

Պետրոսյանի խոսքով՝ ալիքի ազդեցության գոտի կա սահմանված, 1901,5 նիշից բարձր շենք- շինությունները առաջին և երկրորդ փուլերում քանդման ենթակա չեն, դրանց քանդման փուլը տեղի կունենա տարիներ անց, գուցե 5 տարի անց:

Վլադիմիր Գասպարյանի՝ Սևանի ափին գտնվող տունը ևս գտնվում է այդ գոտում:

Մանրամասները՝ տեսանյութում: