Քաղաքականություն
04.03.2021 | 10:46«Դուք երեկ դասակարգեցիք դատավորներին… ԱԺ ազդեցությունը շատ մեծ է: Մարդիկ նորից կսկսեն չմտածել դատավոր դառնալու մասին: Նույնիսկ գաղափարներ կան, որ արտասահմանից դատավորներ բերվեն՝ Հայաստանում աշխատելու: Իսկ մեր լավագույն իրավաբաններին մենք կարողանո՞ւմ ենք խրախուսել, որ գան դատավոր աշխատեն, սոցիալական երաշխիքներ ունե՞նք:
Մենք՝ բոլորս պետք է հոգ տանենք դատավորի անկախության և իրավունքի և մեր երկրի քաղաքացու՝ անկախ դատարան ունենալու իրավունքի վրա: Մեր երկրում օրական 500-600 դատական գործ է քննվում: Մոտ 1200 քաղաքացի ամեն օր նիստերի դահլիճում է մտնում և նայում է մեջտեղում նստած անձին, որն իր սահմանադրական իրավունքն է: Եվ մենք երեկ դասակարգեցինք, և մեր քաղաքացուն ասացինք, երբ որ կնայես, կմտածես դատավորը հայրենիքին նվիրվա՞ծ է, թե՞ այսպիսին (վնգստացող դատավոր-խմբ.)»- այս մասին խորհրդարանի ամբիոնից հայտարարեց Վճռաբեկ դատարանի դատավորի թեկնածու Արսեն Մկրտչյանը:
«Այսօր որևէ դատավոր իրավունք չունի հրապարակային խոսել, քանի որ դուք արգելել եք նրանց խոսել սահմանադրական օրենքով, դա, իհարկե, արդար նպատակ է: Շատ փաստաբաններ ինչո՞ւ այսօր չեն ցանկանում դատավոր դառնալ… Խնդիրը լուծելի է վերաբերմունքով: Մենք պետք է մեծարենք դատավորին, ոչ թե անձին, անուն-ազգանունը, այլ անկախ դատարան ունենալու մեր իրավունքը:
Դուք Դատական օրենսգրքով տվել եք նկարագիրը, թե ով է դատավորը: Ինչքան մեծարենք դատավորին, այնքան դատավորները ինքնամաքրման գործընթացների մեջ ավելի արագ կմտնեն և դուրս կգան պաշտպանական շապիկից, որը գոյություն ունի»,- ընդգծեց Մկրտչյանը:
ԱԺ նախագահ Արարատ Միրզոյանը նշեց, որ իրապես այդ խնդիրը կա. «Դուք լրջագույն հարցի անդրադարձաք: Որևէ գնահատական չի կարող համապարփակ լինել որևէ խնդրի շուրջ, կան նրբերանգներ, որոնք մեդալի երկրորդ կողմ ունեն: Սակայն մենք պետք է ձեզ հետ համաձայնենք, պետք է մենք էլ, դուք էլ բոլոր ջանքերը գործադրենք, որ, մի կողմից՝ դատավորները համապատասխանեն ձեր իսկ մեջբերած վարքագծի կանոններին և առաքելությանը, և մյուս կողմից՝ դատավորը մեծ պատկառանքի արժանանա հանրության կողմից»:
Մանրամասները՝ տեսանյութում:
