15.12.2025 | 19:13
Լուվրը ժամանակավորապես փակ է․ աշխատակիցները գործադուլ են սկսել
ԼՂ-ի շուրջ ստատուս քվոն փոխվել է․ Թուրքիան ՀՀ-ի հետ սահմանները փակ պահելու պատճառ չունի. ԱԳ նախարար. ՏԵՍԱՆՅՈՒԹ
Քաղաքականություն
10.02.2021 | 17:21
Իրավիճակը նոր է՝ նոր մարտահրավերներով և հնարավորություններով: Վիճակը շատ բարդ է, և մեր նպատակն է անել ամեն ինչ, որ Հայաստանի և Արցախի շուրջ անվտանգային մթնոլորտը գնալով ամրապնդվի, և դա հեշտ հարց չէ։ Այս մասին Ազգային ժողով-Կառավարություն հարցուպատասխանի ժամանակ ասաց ԱԳ նախարար Արա Այվազյանը՝ ի պատասխան պատգամավոր Գոռ Գևորգյանի հարցին, թե նոր իրավիճակում ի՞նչ ռազմավարական ու մարտավարական տեսլական ունի Հայաստանը:
«Որպես պետություն, Կառավարություն ու հասարակություն՝ պետք է ձգտենք բոլոր ջանքերը գործադրել, որ իրավիճակը գնա դեպի ապաէսկալացիա, որը կբերի Հայաստանի շուրջ անվտանգության մթնոլորտի ամրապնդմանը: Դիվանագիտության համար նույնպես առաջնահերթ խնդիրը եղել է և մնում է անվտանգության ամրապնդումը»,- նշեց Այվազյանը:
Անդրադառնալով Կարսում թուրք-ադրբեջանական զորավարժություններին՝ նախարարը նշեց, որ ցանկացած զորավարժություն մտահոգության առիթ է տալիս, բայց մյուս կողմից էլ՝ Թուրքիայից տարբեր «մեսիջներ» են գալիս:
«Հաշվի առնելով հենց Թուրքիայի հանգամանքը՝ կարծում եմ, որ ժամանակն է, որ մենք ուղղորդվենք ոչ թե մեսիջներով, ուղերձներով, այլ նախևառաջ գործողություններով: Վստահ եմ, որ Թուրքիան միջազգային հանրության ճնշման ներքո հետզհետե պետք է վերադառնա բնականոն գործընթացի: Արցախում ստատուս քվոն փոխվել է ուժի կիրառման միջոցով, և Թուրքիան այլևս ՀՀ-ի հետ սահմանը փակ պահելու պատճառ չունի: Այս պահին որևէ գործընթաց տեղի չի ունենում, բայց մեր դիվանագիտությունը գործուն ջանքեր է գործադրելու, որ Հայաստանի անվտանգության ամրապնդման համար մթնոլորտը դառնա նպաստավոր»,- նշեց Այվազյանը:
Մանրամասները՝ տեսանյութում:
