Ովքեր են պատերազմի ժամանակ հրամաններ տվել, և որտեղ է եղել Դավիթ Տոնոյանը. ընդդիմությունը բացահայտումներ է խոստանում. ՏԵՍԱՆՅՈՒԹ

Արցախյան երկրորդ պատերազմի վերսկսման պատճառներն ու պարտության հանգամանքները պարզելու, ինչպես նաև պատերազմի 44 օրերի ընթացքում ռազմաքաղաքական ղեկավարության կայացրած որոշումները վերլուծելու նպատակով Ազգային ժողովի «Լուսավոր Հայաստան» խմբակցությունը ցանկանում է փաստահավաք խումբ ստեղծել:

Մանրամասնելով ստեղծվելիք հանձնաժողովի գործառույթները՝ Մարուքյանն ասաց, որ ուսումնասիրելու են մինչ պատերազմը և հետպատերազմական շրջանների զարգացումները: Մասնավորապես, պետք է հանրությանը պարզ լինի՝ արդյո՞ք մինչև սեպտեմբերի 27-ը հայկական կողմը տեղեկացված է եղել, որ թշնամին լայնածավալ հարձակման է պատրաստվում:

Ով է պատերազմը կառավարել 44 օր, ինչպես է կառավարել, ովքեր են հրամաններ տվել, ինչպես է որոշվել զինատեսակների կիրառումն ու զորքի տեղաշարժը. Մարուքյանն ասում է՝ այս և այլ հարցերի պատասխաններ են պարզելու, որոնց զգալի մասը քննարկվելու է գաղտնիության ռեժիմով:

ԼՀԿ ղեկավարը խորհրդարանական և արտախորհրդարանական ուժերի հետ քննարկել է, որպեսզի պարիտետային հանձնաժողովը ստեղծվի Կառավարության որոշմամբ, սակայն իշխող «Իմ քայլը» խմբակցությունը, ըստ Մարուքյանի, դեմ է:

Իշխանություններից զատ՝ փաստահավաք հանձնաժողովի ստեղծմանը դեմ է նաև Սերժ Սարգսյանի ղեկավարած ՀՀԿ-ն: Մարուքյանին հանրապետականներն ասել են, որ պատերազմի հանգամանքները պետք է քննվեն, բայց ո՛չ Նիկոլ Փաշինյանի իշխանության օրոք: Էդմոն Մարուքյանը տեղեկացրեց նաև, որ իր նախաձեռնությանը դրական են արձագանքել ԲՀԿ-ն, ՀՅԴ-ն և վերջին արտահերթ ընտրություններին մասնակցած «Մենք» կուսակցությունների դաշինքը: Այժմ քննարկվում է փաստահավաք հանձնաժողովը ոչ թե Կառավարության որոշմամբ, այլ օրենքով ստեղծելու հարցը։ Չի բացառվում, որ առաջիկայում համապատասխան նախագիծը շրջանառության մեջ կդրվի:

ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանը Մարուքյանի նախաձեռնության մասին ասաց՝ այս պահին իշխող ուժի դիրքորոշումը հայտնել չի կարող, քանի որ նախագիծը շրջանառության մեջ չէ:

Վարդանյանը նաև ակնարկում է, որ Էդմոն Մարուքյանի առաջարկած փաստահավաք խմբի մոդելը կարող է Սահմանադրության հետ անհամապատասխանություն առաջացնել:

ՀՀԿ-ից Դավիթ Հարությունյանն էլ, Factor TV-ի հետ խոսելով «Լուսավոր Հայաստանի»՝ պատերազմի պատճառները բացահայտելու նախաձեռնությունից, ասաց, որ նախ քաղաքականապես առողջ իշխանություն պետք է ունենալ:

Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն էլ օրերս Factor TV-ին ասել էր, որ հիմա պատերազմի հանգամանքներն ուսումնասիրող քննիչ հանձնաժողով ստեղծելու ժամանակը չէ:

Մանրամասները՝ տեսանյութում։

Նարեկ Կիրակոսյան