16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Պետերբուրգում ոստիկանությունը ձերբակալել է 13 ընդդիմադիր պատգամավորի
Քաղաքականություն
21.01.2021 | 13:33
Հունվարի 20-ի երեկոյան Պետերբուրգում ոստիկանությունը ձերբակալել է Սմոլնինսկոե քաղաքային կազմավորման 13 պատգամավորի, որոնց մեծամասնությունը եղել են ընդդիմության ներկայացուցիչներ։ Վերջիններս փորձել են նիստ անցկացնել։ Սա հենց այն պատգամավորների խորհուրդն է, որտեղ անցած տարվա վերջում պատռեցին Պուտինի լուսանկարը, գրում է BBC-ի ռուսական ծառայությունը։
Դեպքը տեղի է ունեցել տեղի վարչական շենքում, որտեղ տեղակայված է նաև «Կանաչ փիղ» մանկական ժամանցի կենտրոնը։
Ձերբակալված պատգամավորներից մեկը՝ Պավել Բեզումովը, ասել է, որ նրանք ստիպված են եղել օգտվել այդ տարածքից, քանի որ այլ կերպ չեն կարողացել մտնել վարչական շենք:
«Ոստիկանությունը ժամանել է, քանի որ մենք քաղաքապետարան ենք մտել «Կանաչ փիղ» ժամանցի կենտրոնի տարածքով: Մենք այնտեղ ենք հայտնվել, քանի որ մեզ թույլ չեն տվել նիստին մասնակցելու համար մուտք գործել քաղաքապետարանի շենքի գլխավոր մուտքով: Արդեն երրորդ անգամ է մեզ թույլ չեն տալիս մուտք գործել շենք»,- պատմել է Բեզումովը:
Իրավապահ մարմիններում Ինտերֆաքսի աղբյուրը միջադեպի վերաբերյալ իրենց տեսակետն է ներկայացրել: «Նրանք պատրաստվում էին հանդիպում անցկացնել իրենց տարածքում, բայց դռները փակ էին: Հետո նրանք գնացել են հարևան սենյակ, որը երեխաների համար է նախատեսված: Ղեկավարությունը չի ցանկացել թույլ տալ կողմնակի անձանց մուտքը՝ հիմնավորելով հակակորոնավիրուսային նորմերով. փոքր սենյակում շատ պատգամավորներ կային», – ասել է գործակալության զրուցակիցը:
Ի վերջո ձերբակալված պատգամավորներին տարել են ոստիկանական տեղամաս, որտեղ կորոնավիրուսային սահմանափակումները խախտելու վերաբերյալ արձանագրություն է կազմվել։
Տաթև Ֆռանգյան
