17.09.2026 | 14:24
Ադրբեջանցի պատգամավորը հայտարարել է, թե կարող է Հայաստանի տարածքում հուշարձաններ «վերականգնել»
Նա պետք է անհապաղ ազատ արձակվի․ Գերմանիան, ԱՄՆ-ն ու Մեծ Բրիտանիան արձագանքել են Նավալնու ձերբակալությանը
Քաղաքականություն
18.01.2021 | 16:09
Գերմանիայի ՆԳ նախարար Հայկո Մաասը կոչ է արել ՌԴ իշխանություններին՝ անհապաղ ազատ արձակել հանրահայտ ռուս ընդդիմադիր գործիչ Ալեքսեյ Նավալնիին, որը ձերբակալվել էր հունվարի 17-ին Գերմանիայից հայրենիք վերադառնալուն պես, գրում է DW-ի ռուսական ծառայությունը։
«Ալեքսեյ Նավալնին ապաքինվելուց հետո հունվարի 17-ի երեկոյան ինքնակամ վերադարձել է Ռուսաստան, որը նա համարում է իր անձնական ու քաղաքական հայրենիքը։ Այն, որ ՌԴ իշխանությունները նրան ձերբակալել են ժամանելուն պես, բացարձակապես անբացատրելի է»,- հայտարարել է Մաասը։
Վաշինգտոնը ևս լուրջ մտահոգություն է հայտնել Մոսկվայում Ալեքսեյ Նավալնիին ձերբակալելու առնչությամբ։ Այս մասին հունվարի 18-ին հայտարարել է ԱՄՆ պետքարտուղար Մայք Պոմպեոն։ Իր հայտարարությունում նա ընդդիմադիր գործչի ձերբակալությունն անվանել է «Նավալնիին և այլ ընդդիմադիր գործիչների, ինչպես նաև Ռուսաստանի իշխանություններին քննադատողների անկախ ձայները լռեցնելու փորձերի մի ամբողջ շարքում վերջին փորձը»:
Պետքարտուղարության ղեկավարը պահանջել է Կոռուպցիայի դեմ պայքարի հիմնադրամի հիմնադրի անհապաղ ու առանց պայմանների ազատ արձակումը։
Մեծ Բրիտանիան ևս կոչ է արել Ռուսաստանին՝ անհապաղ ազատ արձակել ռուս ընդդիմադրին և բացատրել, թե ինչպես է այդ քաղաքական գործիչը քիմիական զենքով թունավորվել։
«Սարսափեցնող է, որ սարսափելի հանցագործության զոհ դարձած Ալեքսեյ Նավալնին ձերբակալվել է Ռուսաստանի իշխանությունների կողմից: Նա պետք է անհապաղ ազատ արձակվի»,- ասել է Մեծ Բրիտանիայի արտգործնախարար Դոմինիկ Ռաաբը:
