17.09.2026 | 17:01
Ռուբեն Ռուբինյանն ու Չեխիայի դեսպանը քննարկել են երկկողմ հարաբերությունների զարգացումը
Բելառուսի ընդդիմությունը պահանջում է Լուկաշենկոյի վարչակազմն ահաբեկչական ճանաչել
Քաղաքականություն
15.01.2021 | 18:17
Բելառուսի ընդդիմությունը պահանջում է Բելառուսի հարցով միջազգային քրեական տրիբունալ ստեղծել։ Այս մասին հունվարի 15-ին հայտարարել է Ազգային հակաճգնաժամային վարչության ղեկավար, համակարգող խորհրդի նախագահության անդամ Պավել Լատուշկոն, գրում է DW-ի ռուսական ծառայությունը։
Ուրբաթ օրը BYPOL նախաձեռնությունը, որը միավորում է ընդդիմությանը համակրող Բելառուսի անվտանգության ուժերի նախկին անդամներին, համացանցում տեղադրել է մի աուդիոձայնագրություն, որում հնչող ձայնը նման է երկրի ներքին գործերի փոխնախարար Նիկոլայ Կարպենկովի ձայնին: Ենթադրվում է, որ ձայնագրությունն արվել է 2020 թվականի հոկտեմբերին։ Ձայնագրման իսկությունը չի ստուգվել:
Դրանում հնչող ձայնը խոսում է ընդդեմ ցուցարարների հրազենային զենք կիրառելու ու նրանց համար հատուկ ճամբարներ ստեղծելու մասին։ Բացի այդ, ենթադրյալ Կարպենկովը հայտարարում է, որ երկրի ղեկավարը նրանց «պահում է բոլոր կողմերից»։ Ձայնագրությունում հնչող ձայնը պնդում է, որ օգոստոսին ցույցերի ժամանակ զոհված Ալեքսանդր Տարայկովսկին «իհարկե, մահացել է կրծքին դիպած ռետինե փամփուշտից»։
Լատուշկոն խոստացել է այդ ձայնագրությունը փոխանցել ՄԱԿ-ի Անվտանգության խորհրդին, ԵՄ խորհրդին, ԵԱՀԿ-ին, Եվրոպայի խորհրդին և առանձին ԱՄՆ ու Ռուսաստանի իշխանություններին։ «Մենք բարձրացնելու ենք Լուկաշենկոյի վարչակազմը ահաբեկչական ճանաչելու հարցը»,- հայտարարել է ընդդիմադիրը։
Տաթև Ֆռանգյան
