Քաղաքականություն
14.01.2021 | 13:58«Հանրապետություն» կուսակցության նախագահ Արամ Սարգսյանն այսօր կառավարություն էր եկել վարչապետ Նիկոլ Փաշինյանի հրավերով: Լրագրողների հետ զրույցում նա նշեց, որ քննարկել են գերիներին, տնտեսության զարգացմանը, ճանապարհներին, երկաթգծին վերաբերող խնդիրներ:
«Ամենաէականը տնտեսական խնդիրներն էին, Հայաստանի տնտեսության զարգացման հետ կապված, այս իրավիճակից տնտեսությունը տեղից պոկելու հետ կապված, երկաթգծի հետ կապված։ Նախկինում այդ երկաթգծով մենք աշխատել ենք և Իրանի հետ, և Թուրքիայի հետ, այդ փորձին էր ուզում ծանոթանալ», – նշեց Սարգսյանը:
Անդրադառնալով ապաշրջափակման մասին հարցին՝ Սարգսյանը նշեց, որ, ընդհանրապես, աշխարհում չկա ժողովուրդ, որն ուզում է շրջափակված ապրել. «Որևէ մեկը մեզ չի հասկանա, եթե ասենք՝ մենք ուզում ենք փակ ապրել, որովհետև փակ ավելի ապահով է: Ցանկացած ապաշրջափակման պետք է այո ասենք, բայց դա բազմաթիվ հարցեր ու բարդություններ ունի»:
Արամ Սարգսյանի խոսքով՝ պետք է փորձել իրավիճակները հարթել: «Մեզ համար շահեկան կլինի, եթե ուժեղ պետություն, ուժեղ տնտեսություն ունենանք, կարողանանք ժամանակին հարիր զինենք բանակը»,- ասաց Սարգսյանը:
Ինչ վերաբերում է Մոսկվա այցի ընթացքում Փաշինյանի օրակարգի տապալմանը, Սարգսյանը նշեց, որ Մոսկվայում տապալվել է նաև Ադրբեջանի օրակարգը, երբ Ալիևը հայտարարում է, որ Ղարաբաղի հարց այլևս չկա և հղում է անում ՌԴ նախագահին. «Այդ հանդիպումը եռակողմ էր, չէր մասնակցում Թուրքիան, իսկ դա Թուրքիայի համար էլ լուրջ հարված է։ Թուրքիան մտածում է՝ Ադրբեջանը թռնում է իր գլխից, ինքնուրույն քայլեր է անում։ Ադրբեջանի ժողովուրդը նույնպես համարում է, որ խնդիրն իսկապես լուծված չէ՝ Ստեփանակերտում հայեր են ապրում, իրենց տարածքում էլ ռուսական զորքեր կան»։
Մանրամասները՝ տեսանյութում:
