08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Արսեն Թորոսյանը պատվաստվել է COVID-19-ի դեմ ռուսական «Սպուտնիկ V» պատվաստանյութով
04.12.2020 | 16:19
ՀՀ առողջապահության նախարար Արսեն Թորոսյանը պատվաստվել է ռուսական «Սպուտնիկ V» պատվաստանյութով։ Տեղեկությունը Factor.am-ի հետ զրույցում հաստատեց ՀՀ ԱՆ խոսնակ Ալինա Նիկողոսյանը:
Նրա խոսքով՝ նախարարն առաջինն է պատվաստվել «Սպուտնիկ V» պատվաստանյութով։
«Նա ստացել է պատվաստման առաջին դոզան, իսկ երբ ժամանակը գա, երկրորդն էլ կստանա»,- հավելեց Նիկողոսյանը:
Նշենք, որ «Սպուտնիկ V» պատվաստանյութով պատվաստումը կատարվում է 2 չափաբաժնով: Երկրորդ չափաբաժինը ստանում են առաջին պատվաստումից 21 օր անց:
Ավելի վաղ՝ նոյեմբերի 21-ին ՀՀ Հիվանդությունների վերահսկման և կանխարգելման ազգային կենտրոն էին ժամանել ՌԴ առողջապահության նախարար Միխայիլ Մուրաշկոն և Ռոսպոտրեբնադզորի ղեկավար Աննա Պոպովան՝ շարժական լաբորատորիայի բացման արարողությանը մասնակցելու: Նրանք իրենց հետ բերել էին նաև COVID-19-ի դեմ «Սպուտնիկ V» պավաստանյութի օրինակներ:
Նշենք նաև, որ Ռուսաստանում արդեն սկսվել է պատվաստման գործընթացը:
Ալինա Նիկողոսյանը նոյեմբերի 23-ին Factor.am-ին տեղեկացրել էր, որ Հայաստանին տրամադրված «Սպուտնիկ V» պատվաստանյութի օրինակները կօգտագործվեն մի քանի կամավորների պատվաստելու համար։
Անժելա Պողոսյան
