17.09.2026 | 19:24
Համաշխարհային օլիմպիադա. Շախմատի Հայաստանի հավաքականները երկրորդ հաղթանակը տարան
Նախագահ Արմեն Սարգսյանը շնորհավորել է Բակո Սահակյանին՝ ծննդյան 60-ամյակի առթիվ
30.08.2020 | 12:28
Հանրապետության նախագահ Արմեն Սարգսյանը շնորհավորական ուղերձ է հղել Արցախի Հանրապետության երրորդ նախագահ Բակո Սահակյանին՝ ծննդյան 60-ամյակի առթիվ, մաղթել նրան քաջառողջություն և ամենայն բարիք։
Ինչպես տեղեկացնում են Հայաստանի Հանրապետության նախագահի աշխատակազմի հասարակայնության հետ կապերի վարչությունից, նախագահ Արմեն Սարգսյանի ուղերձում, մասնավորապես, ասված է.
«Արցախի ձեռքբերումները և հաջողություններն, անկասկած, կապված են նաև Ձեր անվան ու անցած ուղու, Ձեր ողջ կենսագրության հետ, որոնք ժողովրդին ու հայրենիքին հավատարմության և նվիրումի վառ օրինակ են։
Որպես Արցախի Հանրապետության նախագահ պաշտոնավարելու տարիներին Դուք հետևողական ջանքեր եք գործադրել Արցախի պետականության ամրապնդման, անվտանգության ապահովման, սոցիալ-տնտեսական բարեփոխումների իրականացման ուղղությամբ: Ձեր զբաղեցրած տարբեր պետական պաշտոններում, հասարակական ու ազգային գործունեության մեջ Դուք մշտապես աչքի եք ընկել հայրենիքին նվիրվածությամբ ու բարձր պատասխանատվությամբ։
Համոզված եմ, որ Ձեր հեղինակությունը, գիտելիքները, աշխատանքային ու պետական-քաղաքական ակտիվ գործունեության ընթացքում ձեռք բերած հարուստ փորձն այսուհետ ևս կշարունակեք ծառայեցնել Արցախի Հանրապետության զարգացմանն ու առաջընթացին»:
