Արդարությունը պետք է վերականգնվի, որ հնարավոր լինի պաշտպանել այն մեխանիզմներով․ Լարիսա Մինասյան. ՏԵՍԱՆՅՈՒԹ

«Տիկի՛ն Մինասյան, եթե ընդդիմության շահարկումները «Բաց հասարակության հիմնադրամներ – Հայաստանի» վերաբերյալ ինչ-որ տեղ հասկանալի են՝ ավտորիտար ռեժիմի համատեքստում, ապա զարմանալի է նոր իշխանությունների արտահայտությունները, ինչո՞վ է վտանգավոր հիմնադրամի գործունեությունը նոր իշխանությունների համար, հատկապես՝ եթե հաշվի առնենք, որ նոր իշխանության մի մասը ՀԿ սեկտորի ներկայացուցիչ է»,- «Մեդիակենտրոնի» հարցազրույցի ընթացքում հարց տրվեց հիմնադրամի գործադիր տնօրեն Լարիսա Մինասյանին։

Նա այն կարծիքին չէ, որ հնչեցված ինչ-որ կարծիքներ հենց իշխանության դիրքորոշումն են։ Մինասյանը նկատում է՝ ոչ փաստացի եզրակացությունները վտանգավոր են ժողովրդի ընտրած իշխանության հանդեպ վստահությունը խարխլելու տեսանկյունից:

«Մտահոգիչ են անձանց կողմից հիմնադրամի շուրջ չփաստարկված խոսակցությունները։ Ես այդտեղ եմ տեսնում վտանգը, որ դրանք իմաստազրկում են արված աշխատանքները»,- ասաց Մինասյանը։

Իսկ ըստ նրա՝ ինչքանո՞վ են կյանքի կոչվում նոր իշխանությունների հեղափոխական խոստումները․ «Հեղափոխությունը առաջին հերթին մեծ, համակարգային պահանջ է։ Եվ եթե դիտենք այդ տեսակետից, առաջին և մեծ քայլը ազատ և արդար ընտրությունների կատարված փաստն է, դա շատ լուրջ փոփոխություն է»։

Ըստ նրա՝ կան ուղղություններ, որոնցում պետության զավթման կազմաքանդումը լավ է ստացվում, օրինակ՝ հակակոռուպցիոն մեխանիզմները զարգանում են։ Սակայն «երկարատև զավթման» հետևանքով պետական ինստիտուտները շատ դեպքերում դարձել են ոչ գործունակ և նրանց նոր իմաստ է պետք տալ:

«Դրանց փչացված, կոռումպացված լինելու պատճառներն է պետք հեռացնել։ Արդարությունը պետք է վերականգնվի, որ հնարավոր լինի պաշտպանել այն մեխանիզմներով»,- ասաց Լարիսա Մինասյանը։

Մանրամասները՝ տեսանյութում: