COVID-19 վարակի տարածումը կանխելու նպատակով ապրիլից Հայաստանում գործում է քաղաքացիների հեռախոսազանգերն ու տեղաշարժը վերահսկող համակարգ: Այն, սահմանափակելով մարդու անձնական տվյալների պաշտպանությունը, մասնավոր և ընտանեկան կյանքի անձեռնմխելիությունը, հաղորդակցության ազատությունն ու գաղտնիությունը, ըստ կառավարության` նպատակ է հետապնդում բացահայտել վարակակիրների շփման շրջանակը:
Հիշեցնենք՝ աղմկահարույց նախագիծն ընդունվեց մարտի 31-ին, իշխանությունները հաշվի չառան ընդդիմադիր խմբակցությունների և իրավապաշտպանների մտահոգությունները: Կորոնավիրուսով վարակվածներին հայտնաբերելու համար քաղաքացիների տեղաշարժն ու հեռախոսազանգերի շրջանակը բացահայտող համակարգի ներդրումից մինչև հուլիսի 30-ը արտակարգ դրության պարետատունը հայտնաբերել է 174 վարակված քաղաքացու: Այս մասին հայտնում են պարետ, փոխվարչապետ Տիգրան Ավինյանի գրասենյակից Factor.am-ի գրավոր հարցմանն ի պատասխան:
Արտակարգ դրության պարետատնից Factor.am-ին տեղեկացրել են, որ այս ընթացքում վերլուծել են 6 հազար 201 քաղաքացու հեռախոսազանգ, ինչի արդյունքում զանգ է կատարվել 57 հազար 825 այլ քաղաքացիների: Պարզվել է, որ այս անձանցից 1520 հոգի ուղիղ շփում է ունեցել կորոնավիրուսով վարակված քաղաքացիների հետ, նրանցից 174-ի մոտ թեստավորման արդյունքում հաստատվել է կորոնավիրուս:
Ի դեպ, ուշագրավ է, որ կառավարությունը բավականին երկար ժամանակ գաղտնի էր պահում, թե ովքեր են ծրագրի ստեղծողները: Միայն վերջերս պարետատնից հայտնեցին, որ ծրագիրը ստեղծած ինը մասնագետներն են՝ Հարություն Մարտիրոսյանը, Նարեկ Բաղդասարյանը, Սևակ Ղազարյանը, Հովհաննես Սարգսյանը, Գուրգեն Դանիելյանը, Լիլիա Ղուկասյանը, Հայկ Ավետիսյանը, Արմեն Սանասարյանը, Մաքսիմ Ադամյանը:
Նարեկ Կիրակոսյան
