28.11.2024 | 15:01
Շոյգուն հայտարարել է, թե ՌԴ միջուկային «հովանոցն» առաջին հերթին նախատեսված է ՀԱՊԿ երկրների համար
Դոնալդ Թրամփն առաջարկել է հետաձգել ԱՄՆ նախագահի ընտրությունները
Քաղաքականություն
30.07.2020 | 22:35
ԱՄՆ նախագահ Դոնալդ Թրամփն առաջարկել է կորոնավիրուսի համաճարակի պատճառով հետաձգել նոյեմբերին նախանշված նախագահական ընտրությունները։ Այս մասին հաղորդում է DW-ի ռուսական ծառայությունը՝ վկայակոչելով Թրամփի թվիթերյան գրառումը։
«Հետաձգե՞նք ընտրություններն այնքան ժամանակ, մինչև մարդիկ կարողանան նորմալ և անվտանգ քվեարկել»,- գրել է Թրամփը։
Նա կարծիք է հայտնել, որ առաջիկա ընտրություններում, որի ընթացքում ԱՄՆ-ում համաճարակային իրավիճակի պատճառով առաջարկվում է ավելի լայնորեն օգտագործել հեռավար քվեարկության միջոցները, այդ թվում՝ փոստի միջոցով, պատմության ամենից ոչ հստակ և խարդախ ընտրությունները կլինեն։
Քաղաքագետ Շերի Բերմանը, սակայն, DW-ի հետ զրույցում կարծիք է հայտնել, որ փոստով քվեարկության ժամանակ զանգվածային կեղծիքները քիչ հավանական են։ «Ոչ մի ապացույց չկա, որ փոստով քվեարկության դեպքում կեղծարարությունները կավելանան»,- ասել է նա։
Դիտորդների կարծիքով՝ Թրամփի նախաձեռնությունը բացատրվում է ոչ թե քվեարկության արդարության հանգամանքով, այլ նրանով, որ, վերջին սոցհարցումների համաձայն, գործող նախագահը ժողովրդականությամբ հետ է մնում իր մրցակցից՝ դեմոկրատ Ջո Բայդենից։
Բացի այդ, քվեարկությունը մինչև «լավագույն ժամանակները» հետաձգելն այնքան էլ դյուրին չէ, քանի որ ԱՄՆ նախագահի ընտրությունների ժամկետը Կոնգրեսի կողմից օրենսդրորեն ամրագրված է 1845 թվականից։
Հավելենք, որ ԱՄՆ-ում նախագահի ընտրությունները նախանշված են 2020 թվականի նոյեմբերի 3-ին։
