19.09.2026 | 16:22
Երևանում կանցկացվի բժշկական զբոսաշրջության գլոբալ համաժողով
ԵՄ դատարանը ՀԿ-ների օտարերկրյա ֆինանսավորման մասին հունգարական օրենքը խտրական է ճանաչել
Քաղաքականություն
18.06.2020 | 18:12
Հունգարիայում ընդունված օրենքը, որն ուժեղացնում է պետության վերահսկողությունը օտարերկրյա ֆինանսավորմամբ ոչ կառավարական կազմակերպությունների նկատմամբ, խախտում է Եվրամիության օրենսդրությունը։ Այսօր՝ հունիսի 18-ին Լյուքսեմբուրգում նման որոշում է հրապարակել ԵՄ դատարանը, գրում է DW-ն։
2017 թվականին Վիկտոր Օրբանի կառավարության նախաձեռնությամբ ընդունված օրենքը արտերկրից տարեկան 24 հազար եվրոյից ավելի միջոցներ ստացող հասարակական կազմակերպություններին պարտավորեցնում է գրանցվել որպես «օտարերկրյա ֆինանսավորումից շահ ստացող կազմակերպություն» և կարևորագույն օտարերկրյա հովանավորների ցանկ ներկայացնել։
Լյուքսեմբուրգյան դատարանի տեսանկյունից՝ այս նորմերը խախտում են կապիտալի ազառ տեղաշարժի, մասնավոր ոլորտի և տվյալների պաշտպանության իրավունքը, ինչպես նաև միավորումների ազատության հիմնարար իրավունքը։
Դատարանի որոշման հիմնավորման մեջ նշվում է, որ դիտարկվող օրենքի դրույթները կապիտալի տեղաշարժի «խտրականություն և սահմանափակում» են, որոնք կարող են «անվստահության մթնոլորտ» ստեղծել հասարակական կազմակերպությունների նկատմամբ։
ՀԿ-ների, ինչպես նաև արտերկրից ֆինանսավորում ստացող բուհերի մասին օրենքների հարցով Բուդապեշտի դեմ 2017 թվականի դեկտեմբերին դատական հայց էր ներկայացրել Եվրահանձնաժողովը։
