Չգնահատված վաստակն ու շռայլված կոչումները․ ովքե՞ր են արժանացել ուշադրության  և ովքե՞ր՝ մնացել ստվերում

2002 թ. ընդունված «Պատվավոր կոչումների մասին» ՀՀ օրենքով սահմանվել է վաստակավոր արտիստի կոչումը։ Դրանից հետո այն վերասահմանվել է երկու անգամ։  Անցնող տարիներին այդ կոչումների շնորհումն ամեն անգամ բուռն քննարկման թեմա է դառնում, քանի որ վաստակավորի կոչումներ ստացողների վաստակը շատ դեպքերում գնահատվում է անհամարժեք: Դրան զուգահեռ՝ բազմաթիվ վաստակաշատ գործիչներ մնում են ստվերում:             

Factor.am-ը պարզել է, թե այս տարիների ընթացքում հայտնի, վաստակ ունեցող արտիստներից, մշակույթի գործիչներից ովքեր են, որ չեն արժանացել  վաստակավորի կոչման։

Այսպիսով՝ երգիչ, երգահաններ՝ Արթուր Մեսչյանը, Ռուբեն Հախվերդյանը, Վահան Արծրունին, Լիլիթ Պիպոյանը, դերասաններ՝ Աշոտ Ադամյանը, Ալլա Թումանյանը, Անահիտ Ղուկասյանը, Սոֆիկ Սարգսյանը, օպերային երգչուհի Արաքս Մանսուրյանը, կինոօպերատոր Լևոն Աթոյանցը, վաստակավորի կոչման չեն արժանացել։ Փոխարենը հատկապես վերջին տարիներին վաստակավորի կոչումներ շռայլվեցին, այսպես ասած, շոու-բիզնեսի ներկայացուցիչների։ Այդ երևույթը բազմիցս քննադատվեց  հայ հանրության կողմից։ Այսպիսով՝ 2006-ին   Հայաստանի վաստկավոր արտիստի կոչման է արժանացել երգիչ Թաթան, 2012-ին՝ Արման Հովհաննիսյանը, 2015-ին՝ Արմենչիկը, Հարութ Փամբուկչյանը, Ալիկ Գյունաշյանը։ 2016-ին՝ Ավետ Բարսեղյանը, 2017-ին՝ Արամեն,  Ռազմիկ Ամյանը, Մհեր Մեսրոպյանը, Մկրտիչ Արզումանյանը։

Հավելենք, որ համաձայն ՀՀ Սահմանադրության 55-րդ հոդվածի 16-րդ կետի՝ կոչումը շնորհում է Հայաստանի Հանրապետության նախագահը։  2014 թվականից նախագահը շնորհում է պատվավոր կոչումներ անձնական նախաձեռնությամբ, ինչպես նաև պատվավոր կոչումներ շնորհելու վերաբերյալ պաշտոնատար անձանց միջնորդությունների հիման վրա։

Աննա Բաբաջանյան