ԱԺ-ն առաջին ընթերցմամբ ընդունեց բժիշկների դեմ բռնություն գործադրողների պատիժը խստացնելու մասին օրենքի նախագիծը

Խորհրդարանն առաջին ընթերցմամբ ընդունեց ՀՀԿ-ական պատգամավորներ Կարեն Ավագյանի և Հրայր Թովմասյանի ներկայացրած բժիշկների դեմ բռնություն գործադրողների պատիժը խստացնելու մասին օրենքի նախագիծը:

Մինչ քվեարկությունը վարման կարգով ելույթ ունեցավ ԱԺ «Ելք» խմբակցության պատգամավոր Արարատ Միրզոյանը` ընդգծելով, որ ակնհայտորեն առաջադիմական փոփոխություն է և «Ելք» խմբակցությունը կողմ է քվեարկելու սրան:

«Բայց մեկ վերապահում ունեմ. ինձ համար առնվազն տարօրինակ էր, երբ այլընտրանքային կարծիք էր հնչում ՀՀԿ խմբակցությունից, մի անգամից սաստեցիք, թե ներկուսակցական հարթակ կա, նորմալ է, կարծում եմ»,- ասաց ընդդիմադիր պատգամավորը:

ԱԺ փոխնախագահ Էդուարդ Շարմազանովի արձագանքն այս դիտարկմանը չուշացավ. «Դուք մեր ներկուսակցական հարցերով մի զբաղվեք, հանգիստ եղեք»:

ԱԺ փոխնախագահ Արփինե Հովհաննիսյանը ևս պարզաբանեց. «Ինչ վերաբերում է իմ նկատառմանը ապա, այն հետևյալն էր` ես իմ գործընկերոջ մասնագիտական դիտարկմանը չեմ անդրադառնա ԱԺ ամբիոնից` հաշվի առնելով, որ մենք կարող ենք հանձնաժողովում մասնագիտական քննարկում ծավալել: Սաստելու ոչինչ չկա, խնդրում եմ մի խեղաթյուրեք»:

ԱԺ նախագահ Արա Բաբլոյանը ևս վարման կարգով ելույթ ունեցավ: «Կոչ եմ անում նախագծի վերաբերյալ քվեարկությունը չքաղաքականացնել, այլ քվեարկել սեփական համոզմունքներին և խղճին համապատասխան»,- ասաց նա:

Նախագիծն ընդունվեց ձայների 56 կողմ, 2 դեմ և 23 ձեռնպահ ձայների հարաբերակցությամբ: