09.10.2026 | 21:13
Ադրբեջանի դպրոցներում աշակերտները բողոքի ակցիաներ են անցկացրել հիջաբ կրելու արգելքի դեմ․ ՏԵՍԱՆՅՈՒԹ
Կորոնավիրուսի հետևանքով եկամտից զրկված գյումրեցի ավելի քան 300 անապահով ընտանիք պարենային աջակցություն է ստացել
Հասարակություն
13.04.2020 | 15:55
Կորոնավիրուսի համավարակի ու արտակարգ դրության պայմաններում Գյումրիի ու Շիրակի մարզի բազմաթիվ բնակիչներ զրկվել են իրենց եկամտից, ամենօրյա կենսապահովման խնդիր է առաջացել։ Այս մարդկանց ու խոցելի այլ խմբերին օգնելու համար Շիրակի մարզպետարանը սկսել է համագործակցել միջազգային ու տեղական բարեգործական կազմակերպությունների հետ։
Մասնավորապես, «IDEA» և «Շառլ Ազնավուր» հիմնադրամներն օգնություն են ցուցաբերել Բարեկամության այգու բնակիչներին, ամերիկացի բարերարներից մեկը՝ «Թռչունյան տուն» մանկատան՝ ընտանիք վերադարձած երեխաներին։ 2.000 պարենային փաթեթներ էլ տրամադրելու է «Ռուսաստանի հայերի միությունը», որոնք բաշխվելու են Շիրակի մարզի գյուղական համայնքների թիրախային խմբերի ընտանիքներին։
Իսկ ահա USAID-ի «Մի բան անենք» նախաձեռնության տրամադրած 1000 սննդային փաթեթների կեսը մարզպետարանը բաշխել է «Պարենային շտապ օգնություն» ծրագրի հետ համագործակցելով։
«Պարենային շտապ օգնություն» ծրագիրը մեկնարկել է մարտի 28-ից և մինչ այժմ ավելի քան 300 գյումրեցի անապահով ընտանիքի պարենային փաթեթներ են բաժանվել։
«330 ընտանիքի արդեն օգնություն է բաժանվել։ Այս պահին ունենք 2.799 հայտ, որոնցից դիտարկման փուլում է 1.300-ը, մերժվել է 469 հայտ, կարիքների գնահատման փուլում ունենք 292 հայտ։ Ունենք նաև սպասողներ, որոնք ծրագրի հիմնական շահառուները չեն, իրենց մոտ բարձր չէ խոցելիությունը։ Եթե բոլոր դիմորդներին, ում խոցելիությունը բարձր է, կարողանանք ապահովել, արդեն կանդրադառնանք սպասողներին»,- մեզ հետ զրույցում ասաց «Պարենային շտապ օգնություն» ծրագրի հանրային կապերի պատասխանատու Գրիշա Հովսեփյանը։
Նա վստահեցրեց, որ ընտանիքների մի մասը ստանում է ոչ թե միանվագ, այլ շարունակական աջակցություն։
«Կա 7-օրյա, 15-օրյա, մեկամսյա կրկնվող աջակցություն՝ ըստ ընտանիքի վիճակի։ Անդամների թվի համեմատ էլ սնունդ է տրամադրվում»,- ասաց Հովսեփյանը։
Ծրագիրն արդեն ստացել է 4 մլն դրամի պարենային աջակցություն, ավելի քան 2 մլն դրամի էլ գումարային փոխանցումներ են կատարվել։ Անապահով ընտանիքներին օգնել ցանկացողների աշխարհագրությունը բավական մեծ է՝ արձանգանքներ կան և՛ սփյուռքից, և՛ Հայաստանից։
«Ունենք մի քանի մեծ դոնորներ, ովքեր խոշոր գումարներ են փոխանցել արտասահմանից, իսկ քանակական առումով՝ ավելի շատ Հայաստանից են փոխանցումները, բայց գումարայինով գրեթե հավասար են»,- ասաց Գրիշա Հովսեփյանը։
Պարենային օգնության այս ծրագիրը նախատեսվում է իրականացնել մինչև արտակարգ դրության ավարտը։ Մեր զրուցակիցը նշում է՝ ճանապարհի կեսից ծրագիրը չի դադարեցվի, մինչև վերջ կօգնեն ու կաջակցեն խոցելի ընտանիքներին։
Ի դեպ՝ ծրագրին մասնակցելու համար շահառուները կարող են գրանցվել օնլայն՝ shtapognutyun.am կայքում։ Անապահով ընտանիքներին օգնել ցանկացողներն էլ կարող են donate4gyumri.am կայքում առկա հաշվեհամարներին փոխանցումներ կատարել կամ պարենային օգնություն թողնել Գյումրիի մեծ խանութներում ու սուպերմարկետներում տեղադրված հատուկ զամբյուղներում ու սայլակներում։
Էմմա Չոբանյան
