Ինձ դուր է գալիս, որ վարչապետն այս օրերին անձամբ է շփվում ժողովրդի հետ. Նիկոլայ Ծատուրյան

«Ինձ դուր է գալիս այն, որ վարչապետն այս օրերին անձամբ է շփվում ժողովրդի հետ.այդպես էլ պետք է լիներ: Նախորդ ղեկավարներն անգամ  երկրի համար դժվարին պահերին խուսափում էին հաղորդակցվել մարդկանց հետ»,- Factor.am-ի հետ զրույցում նման տեսակետ հայտնեց բեմադրիչ, ռեժիսոր Նիկոլայ Ծատուրյանը՝ անդրադառնալով երկրում հայտարարված արտակարգ դրությանը:

Նրա համոզմամբ՝ իշխանությունը բավական հոգատար է ամեն քաղաքացու նկատմամբ, իսկ հանրությունն էլ խուճապի մեջ չէ, սակայն պետք է ավելի աչալուրջ լինի. «Պարզ է, որ եթե կորոնավիրուսով վարակվածների թիվը զգալիորեն մեծանա, մեր ռեսուրսները չեն բավարարի՝ մարդկային ռեսուրսից մինչև տեխնիկական: Եվ  որպեսզի առողջապահական համակարգը կաթվածահար չլինի, մնացե՛ք տանը, զգու՛յշ եղեք: Ինքս տնից դուրս չեմ գալիս, շփումներս հասցրել եմ մինիմալի»:

Պարոն Ծատուրյանն այն համոզման է, որ մեր պետությունը պատվով է դուրս գալու ստեղծված իրավիճակից. «Ամեն դեպքում, պետք է հաշվի առնել, որ սա պատերազմի պես բան է: Իրավիճակը հաղթահարելուց հետո դեռ պետք է նաև վերականգնվենք, իսկ դրա համար հարկավոր է, որ այս պահից սկսած միաբան լինենք: Փառք աստծո, ես նկատում եմ նաև ժողովրդի միասնականությունը»:

Անդրադառնալով թատրոնների գործունեության դադարեցմանը, բեմադրիչը նկատեց, որ օնլայն փորձերն արդյունավետ չեն, բայց այս օրերին կարևոր է նաև արվեստի ներկայությունը բոլորիս կյանքերում: «Օրերս ինձ հիացրեց դաշնակահար Դենիս Մացուևի համերգը դատարկ դահլիճում. մեկ ու կես միլիոն մարդ օնլայն հետևել էր դրան: Ամեն դեպքում, արվեստը կփրկի աշխարհը»,- եզրափակեց մեր զրուցակիցը:

Աննա Բաբաջանյան