10.08.2026 | 09:48
ՀՀ տարածքում ավտոճանապարհներն անցանելի են
Հայաստանի ծանրամարտի կանանց հավաքականը ուսումնամարզական հավաք է անցկացնում
19.02.2020 | 13:02
Հայաստանի ծանրամարտի կանանց հավաքականը փետրվարի 19 –ից մինչև մարտի 7 –ը Ծաղկաձորում կանցկացնի ուսումնամարզական հավաք: Գլխավոր մարզիչ Արտաշես Ներսիսյանն ասաց, որ հիմնական նպատակը աղջիկների ընդհանուր ֆիզպատրաստականության որակները բարելավելն է:
Ծաղկաձորյան հավաքից հետո աշխատանքները կշարունակվեն Երևանում: Պարապմունքները կունենան տեխնիկան հղկելու և կիլոգրամներն աստիճանաբար ծանրացնելու նշանակություն:
Կհաջորդի Մոսկվայում ապրիլի 3 –ին սկսվելիք Եվրոպայի առաջնությունը: Հույս կա, որ Իզաբելա Յայլյանը և Տաթև Հակոբյանը Տոկիոյի օլիմպիական խաղեր մեկնելու ուղեգրի կարժանանան: Նրանցից յուրաքանչյուրն արդեն մասնակցել է մրցակարգով սահմանված միջազգային վարկանիշային մրցաշարերից հինգին և մոսկովյան ստուգատեսը թվով վերջինը` վեցերորդը կլինի:
Գլխավոր մարզիչն անդրադարձավ Երևանում անցկացված Հայաստանի առաջնությանը: Մեր երկրում կանանց ծանրամարտի աշխարհագրությունն ընդարձակվել է: Հայտավորված շուրջ 50 մարզուհիները ներկայացնում էին Գյումրին, Արարատը, Էջմիածինը, Քասախը, մի քանիսն էլ ` Երևանն ու Վանաձորը:
Ընդհանրապես մեծ է տեղերում աշխատող մասնագետների դերը: Որքան շատ լինեն տեխնիկապես գրագետ մարզուհիները, այնքան հեշտ ու արդյունավետ կլինի հավաքականի մարզիչների գործը: Այդ պարագայում կավելանան նաև նվաճումները:
