Հասարակություն
03.02.2020 | 16:26
«Մանվել Գրիգորյանն այս երկու տարվա ընթացքում դարձավ անդամալույծ»,- այս մասին այսօր լրագրողների հետ հանդիպմանը հայտարարեց Գրիգորյանի պաշտպաններից Լևոն Բաղդասարյանը:
Նա պնդեց, թե Հայաստանի բժշկությունն անզոր է կանխելու հիվանդությունների վատթարացումը։ Փաստաբանը հերքեց այն տեղեկատվությունը, որ Մանվել Գրիգորյանը կարճ ժամանակահատվածով տուն է գնացել ու վերադարձել:
«Հերքում եմ նման բան չկա, նա պալատից տեղափոխվել էր վերակենդանացման բաժանմունք, այս պահին ևս այնտեղ է գտնվում»,-տեղեկացրեց Բաղդասարյանը։
«Մանվել Գրիգորյանի հիվանդությունները վատթարացել են անմարդկային վերաբերմունքի հետևանքով և եթե սրան ականջալուր չլինի բարձր իշխանությունը, ամբողջ պատասխանատվությունն ընկնելու է վերջինիս վրա»,- հավելեց փաստաբանը։
Նշենք, որ Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Լիլիթ Շաբոյան
