Բարձր գնահատեցի, որ վարչապետը ներկայացրեց՝ ում կողմից և ինչ նպատակով է այս արշավը սկսվել. ՏԵՍԱՆՅՈՒԹ

«Ստի վրա է հիմնված այն հարցը, որ «Բաց հասարակության հիմնադրամներ-Հայաստանը» հակահայկական գործունեություն է ծավալում»,- այսօր տեղի ունեցած ասուլիսի ընթացքում հայտարարեց հիմնադրամի գործադիր տնօրեն Լարիսա Մինասյանը։

Նա անդրադարձավ վարչապետ Նիկոլ Փաշինյանի՝ վերջին ասուլիսում հիմնադրամի վերաբերյալ հարցին ի պատասխան արված մեկնաբանությանը․ «Ես շատ բարձր գնահատեցի այն, որ վարչապետը ներկայացրեց, թե ում կողմից և ինչ նպատակներով է այս արշավը սկսված։ Վստահությունը, որ մեր հանրությունը ձեռք է բերել հեղափոխությունով, նպատակ կա այն խարխլել։ Թե ո՞վ է դա անում և ինչո՞ւ է անում, հստակ հնչեց։ Մեր հիմնադրամի լեգիտիմությունը Հայաստանում մեր՝ թափանցիկ, բաց և հաշվետու ձևով աշխատելն է, և ոչ թե այն, որ նախկինում չեն փակել մեր հիմնադրամը»,- ասաց Լարիսա Մինասյանը։

Հիշեցնենք, որ «Բաց հասարակության հիմնադրամները» Հայաստանում գործում է 1997 թվականից սկսած։ Վարչապետն իր ասուլիսում, մասնավորապես ասել է․ «Եթե այդքան վատ բան էր, թող փակեին, ինչո՞ւ չեն փակել։ Այդ գրասենյակի գոյության ողջ ընթացքի 5%-ը մեր իշխանության շրջանում է, 95%-ը՝ ձեր իշխանության։ Ինչո՞ւ չեք փակել։ Այսօր բոլոր նրանք, ովքեր այդ թեմայով շահարկումներ են անում, նախկին իշխանության մեջ կամ տեղ են ունեցել, կամ թիմի անդամ են ունեցել կամ նրանց շրջապատում այդ մարդիկ են։ Բոլոր հանրապետականները, նախկինում Ոստիկանությունում, պետական կառավարման համակարգում բարձրաստիճան պաշտոն զբաղեցրած մարդիկ, կանգնե՛ք, բացատրություն տվեք՝ երբ իշխանական կերակրատաշտի մոտ էիք, ինչո՞ւ չէիք փակում այդ հիմնադրամները։ Ի՞նչ է նշանակում «սորոսական»։ Ես թույլ չեմ տա, որ Հայաստանի որևէ քաղաքացու հասցեին քամահրական կամ արհամարհական այդպիսի բան ասեն։ Բոլոր նրանք, ովքեր դա ասում են, կոռումպացված հանրապետականներ են, պետական դավաճաններ։ Եկեք հետաքննություն սկսենք՝ այդ մարդկանցից քանիսն է դրամաշնորհ ստացել այդ կազմակերպություններից, ինչքա՞ն են սնվել։ Եկեք սկսենք և բացեք այդ խոսակցությունը»,- ասաց Փաշինյանը։

Մանրամասները՝ տեսանյութում:

Ռոբերտ Անանյան