26.09.2026 | 20:38
Քաղաքացին ընկել է ջրհորը. նա հոսպիտալացվել է
«Արայիկ Հարությունյանը թող մոռանա, որ ինքն է որոշում՝ մնա, թե ոչ» ՀՅԴ ՀԵՄ անդամներ. ՏԵՍԱՆՅՈՒԹ
Քաղաքականություն
19.12.2019 | 12:55
Այս երկրի պետականամետը մենք ենք, չփորձե՛ք Հայաստանը պաշտպանել մեզնից։ Եթե դառնանք պարտիզան, լավ գիտենք, որ սահմանից այն կողմ ենք պարտիզանություն անելու, եթե զենք բարձրացնենք, միանշանակ սահմանից այն կողմ է այդ զենքը լինելու։ Իսկ ՀՀ-ում, բոլոր օրինական միջոցներով, և՛ քննադատելու ենք իշխանություններին, և՛, հարկ եղած դեպքերում, աջակցելու ենք։ Լավին լավ ենք ասելու, վատին՝ վատ։ Այս մասին այսօր՝ ԿԳՄՍ նախարար Արայիկ Հարությունյանի հրաժարականի պահանջով հերթական ակցիայի ընթացքում ասացին ՀՅԴ ՀԵՄ անդամները։
Ակցիայի մասնակիցները ներկայացրին 15 փաստ, թե ինչու Արայիկ Հարությունյանը չպետք է ղեկավարի Կրթության, գիտության, մշակույթի և սպորտի նախարարությունը։
«Արայիկ Հարությունյանը պաշտոնավարում է ՝ առանց հասարակության հետ հետադարձ կապի ապահովման և հաշվետվողականության։ Նա անհիմն մեղադրում, պիտակավարում և հեգնում է հասարակության անդամներին, սպառնում իրենից տարբեր կարծիք ունեցող քաղաքացիներին։ Նա սպասարկում է նեղ խմբի շահեր և նեղ խմբի ճաշակներն արտացոլող քաղաքականություն։ Նա ասում է՝ հրաժարական կտա միայն այն դեպքում, երբ ինքն այդպես որոշի։ Մենք ասում ենք՝ թող մոռանա, որ ինքն է որոշում՝ մնա, թե ոչ»,- ասացին ակցիայի մասնակիցները։
Նրանք նաև նամակ էին պատրաստել, որը հանձնեցին Կառավորության դիմում-բողոքների բաժնի ներկայացուցչին։ ՀՅԴ ՀԵՄ անդամները լրագրողների հետ զրույցում նշեցին, որ այս տարի սա նրանց վերջին ակցիան է։ Նրանք հավելեցին, որ չեն պատրաստվում հանդիպել ԿԳՄՍ նախարար Արայիկ Հարությունյանի հետ, եթե անգամ նման առաջարկ լինի։
«Նախարարն արդեն ուշացել է»,- ասացին նրանք։
Հիշեցնենք, որ ՀՅԴ ՀԵՄ անդամներն արդեն շուրջ մեկ ամիս է՝ բողոքի ակցիաներ են իրականացնում՝ պահանջելով ԿԳՄՍ նախարարի հրաժարականը: Նրանց վերջին ակցիայի ընթացքում շուրջ 24 անձ բերման էր ենթարկվել՝ Էրեբունու և Կենտրոնի ոստիկանական բաժանմունքներ։
Մանրամասները՝ տեսանյութում։
Նելլի Մելքոնյան
